തിരുവനന്തപുരം: പാന്‍ കാര്‍ഡും ആധാര്‍ കാര്‍ഡും ബന്ധിപ്പിക്കേണ്ട സമയപരിധി ഇന്ന് അവസാനിക്കുകയാണ്. ഇങ്ങനെ ചെയ്യാത്തവര്‍ ആയിരം രൂപ പിഴ അടക്കേണ്ടിവരും. ആദായ നികുതി റിട്ടേണ്‍ സമര്‍പ്പിക്കാനും കഴിയില്ല. അടുത്ത ഘട്ടത്തില്‍ ആദായ നികുതി വകുപ്പ് സെക്ഷന്‍ 139 എഎഎ(2) വകുപ്പുപ്രകാരം സാങ്കേതികപരമായി പാന്‍ അസാധുവാകുകയും ചെയ്യും. ഒന്നിലധികം പാന്‍ കാര്‍ഡുകള്‍ കൈവശം വച്ചിരിക്കുന്നവരെ കണ്ടെത്താനാണ് ഈ സംവിധാനം.
ആദ്യം പാന്‍ കാര്‍ഡും ആധാര്‍ കാര്‍ഡും ബന്ധിപ്പിക്കേണ്ട അവസാന തീയതി ഓഗസ്റ്റ് 31, 2017 ആയിരുന്നു. പിന്നീട് ഈ തീയതി നീട്ടിക്കൊണ്ട് പോവുകയായിരുന്നു. അതുകൊണ്ട് തന്നെ പലരും മുന്‍പേ തന്നെ ഈ കാര്‍ഡുകള്‍ തമ്മില്‍ ലിങ്ക് ചെയ്ത് കാണും. ചിലര്‍ ചെയ്തിട്ടുണ്ടാകില്ല. നിങ്ങള്‍ ആധാറും പാനും തമ്മില്‍ നേരത്തെ ബന്ധിപ്പിച്ചോ എന്ന് എങ്ങനെ അറിയാം ? ഇല്ലെങ്കില്‍ എങ്ങനെ ബന്ധിപ്പിക്കണം ?
ആധാറും പാനും തമ്മില്‍ ബന്ധിപ്പിക്കാന്‍ മൂന്ന് വഴികളുണ്ട്.
ഓണ്‍ലൈന്‍ ലിങ്കിംഗ്
www.incometaxindiaefiling.gov.in എന്ന വെബ്സൈറ്റ് സന്ദര്‍ശിക്കുക. ഇവിടെ 'ലിങ്ക് ആധാര്‍' എന്ന ടാബില്‍ ക്ലിക്ക് ചെയ്യുക. ശേഷം പാന്‍ നമ്പര്‍, ആധാര്‍ നമ്പര്‍, പേര് തുടങ്ങി അവര്‍ ചോദിക്കുന്ന വിവരങ്ങളെല്ലാം നല്‍കി നടപടിക്രമങ്ങള്‍ പൂര്‍ത്തിയാക്കുക.
ഇന്‍കംടാക്സ് അക്കൗണ്ട് വഴി
ഇന്‍കംടാക്സ് ഇ-ഫയലിംഗ് പോര്‍ട്ടലില്‍ ലോഗ് ഇന്‍ ചെയ്യുക. അക്കൗണ്ട് ഇല്ലാത്തവര്‍ അക്കൗണ്ട് ഉണ്ടാക്കണം. ആ അക്കൗണ്ടില്‍ ലോഗിന്‍ ചെയ്തയുടന്‍ തന്നെ പാന്‍ -ആധാര്‍ ലിങ്ക് എന്ന് കാണിക്കുന്ന ഒരു പോപ്പ് അപ്പ് വരും. അല്ലെങ്കില്‍ പ്രൊഫൈല്‍ സെറ്റിംഗ്സില്‍ പോയി ലിങ്ക് ആധാര്‍ എന്ന ടാബ് സെലക്ട് ചെയ്യാം. തുടര്‍ന്ന് ആധാര്‍ നമ്പറും നല്‍കി ആധാര്‍ ലിങ്ക് ചെയ്യാം.
എസ്എംഎസ്
ഇതൊന്നുമല്ലാതെ എസ്എംഎസ് വഴിയും ആധാര്‍ കാര്‍ഡും പാന്‍ കാര്‍ഡും തമ്മില്‍ ബന്ധിപ്പിക്കാം. താഴെ കാണുന്ന ഫോര്‍മാറ്റില്‍ 567678 അല്ലെങ്കില്‍ 56161 എന്ന നമ്പറിലേക്ക് മെസേജ് അയക്കുകയാണ് വേണ്ടത്.
UIDPAN<12 digit Aadhaar><10 digit PAN>
ആധാറും പാനും നേരത്തെ ബന്ധിപ്പിച്ചോ എന്ന് എങ്ങനെ അറിയാം ?
www.incometaxindiaefiling.gov.in/aadhaarstatus എന്ന വെബ്സൈറ്റ് സന്ദര്‍ശിക്കുക. ഇവിടെ ആധാര്‍ നമ്പര്‍, പാന്‍ നമ്പര്‍ എന്നിവ നല്‍കി 'വ്യൂ ലിങ്ക് ആധാര്‍ സ്റ്റേറ്റസ്' എന്ന ടാബില്‍ ക്ലിക്ക് ചെയ്യുക.