പാലക്കാട്: നിയമസഭാ തിരഞ്ഞെടുപ്പിന് മുന്നോടിയായി പണവും ലഹരി പദാർത്ഥങ്ങളും ഉൾപ്പെടെയുള്ള അനധികൃത വസ്തുക്കളുടെ കടത്ത് തടയാൻ ചെക്ക്‌ പോസ്റ്റുകളിൽ കർശന പരിശോധന നടത്തും.
അനധികൃത പണം ഉൾപ്പെടെ വിതരണത്തിനെത്തിക്കാനുള്ള സാഹചര്യം മുൻകൂട്ടി കണ്ട് നടപടി സ്വീകരിക്കും. ചെക്ക്‌ പോസ്റ്റുകളിലെ ക്യാമറ നിരീക്ഷണം ശക്തിപ്പെടുത്തും. ഗോഡൗണുകൾ ഉൾപ്പെടെയുള്ള കേന്ദ്രങ്ങളിൽ പരിശോധന നടത്തും.
അതിർത്തി പങ്കിടുന്ന സംസ്ഥാനങ്ങളിലെ വകുപ്പ് മേധാവികളും ബന്ധപ്പെട്ട ഉദ്യോഗസ്ഥരുമായി അതിർത്തി ജില്ലകളിലെ കലക്ടർമാരും കേരളത്തിലെ എൻഫോഴ്സ്‌മെന്റ് ഏജൻസി മേധാവികളും ചർച്ച നടത്തി നടപടി സ്വീകരിക്കും. ഓരോ വിഭാഗവും നടത്തുന്ന പ്രവർത്തനം സംബന്ധിച്ച് മുഖ്യ തിരഞ്ഞെടുപ്പ് ഓഫീസർക്ക് പ്രതിദിന റിപ്പോർട്ട് നൽകും.