അടൂർ : ജീവകാരുണ്യ പ്രസ്ഥാനമായ മഹാത്മ ജനസേവനകേന്ദ്രം രക്ഷാധികാരിയായിരുന്ന പി.ശ്രീനിവാസൻ ഐ.പി.എസ് ന്റെ സ്മരണാർത്ഥം ഏർപ്പെടുത്തിയ മഹാത്മ മാതൃരത്നം അവാർഡിന് നോമിനേഷനുകൾ ക്ഷണിച്ചു. സ്വന്തം കുഞ്ഞുങ്ങളെ കല്ലിലടിച്ചും, ബലിദാനം ചെയ്തും ക്രൂരമായി കൊന്നൊടുക്കുന്ന സമൂഹത്തിനോടുളള പ്രതിക്ഷേധവും, തിന്മകൾക്കെതിരെയുളള ബോധവത്ക്കരണവുമാണ് മാതൃരത്നം അവാർഡിനാൽ ലക്ഷ്യമാക്കുന്നത്. വൃഥകളെയും, പ്രതിസന്ധികളെയും അതിജീവിച്ച് മാതൃത്വമെന്ന വാക്കിന് ജീവിതം കൊണ്ട് മഹനീയമാക്കുന്ന മാതാവിനാണ് അവാർഡ് ലഭിക്കുക. സാമൂഹ്യ പ്രവർത്തകർക്കോ, ജനപ്രതിനിധികൾക്കോ തങ്ങൾക്ക് നേരിട്ട് അറിവുളള മികച്ച മാതൃത്വങ്ങൾക്കായ് നോമിനേഷൻ നൽകാം. നോമിനേറ്റ് ചെയ്യപ്പെടുന്ന ആളുടെ ബയോഡേറ്റയും, ജീവിത സാഹചര്യങ്ങളും, കുടുംബ പശ്ചാത്തലവും, നേട്ടങ്ങളും പ്രതിസന്ധികളും വ്യക്തമാക്കുകയും സാക്ഷ്യപ്പെടുത്തുകയും വേണം. തിരഞ്ഞെടുക്കപ്പെടുന്ന പത്ത് പേരിൽ നിന്ന് ഒരാൾക്ക് അവാർഡ് ലഭിക്കുകയും ബാക്കിയുളളവരെ ആദരിക്കുകയും ചെയ്യും. 25000 രൂപയും ശിൽപ്പവും പ്രശസ്തി പത്രവും അടങ്ങുന്നതാണ് അവാർഡ്. നോമിനേഷനുകൾ ലഭിക്കേണ്ട അവസാന തീയതി മാർച്ച് 25. നോമിനേഷനുകൾ ലഭിക്കേണ്ട വിലാസം മാതൃരത്നം, മഹാത്മ ജനസേവന കേന്ദ്രം, ചേന്നംപളളി, അടൂർ 691523.