പത്തനംതിട്ട : തിരഞ്ഞെടുപ്പുമായി ബന്ധപ്പെട്ട് ജാഥ സംഘടിപ്പിക്കുന്ന ഒരു പാർട്ടിയോ സ്ഥാനാർത്ഥിയോ ജാഥ തുടങ്ങുന്നതിനുള്ള സമയവും സ്ഥലവും പോകേണ്ടവഴിയും ജാഥ അവസാനിക്കുന്ന സമയവും സ്ഥലവും മുൻകൂട്ടി തീരുമാനിച്ച് ബന്ധപ്പെട്ടവരിൽ നിന്ന് അനുവാദം വാങ്ങണം എന്നാണ് തിരഞ്ഞെടുപ്പ് കമ്മിഷന്റെ പെരുമാറ്റച്ചട്ട നിബന്ധന. മറ്റു രാഷ്ട്രീയ പാർട്ടികളിലെ അംഗങ്ങളെയോ അവരുടെ നേതാക്കളെയോ പ്രതിനിധാനം ചെയ്യുന്ന കോലങ്ങൾ കൊണ്ടുപോകുന്നതിനും പരസ്യമായി അവ കത്തിക്കുന്നതും അനുവാദമില്ല. ഇങ്ങനെയുള്ള പ്രകടനങ്ങൾ ഏതെങ്കിലും രാഷ്ട്രീയ കക്ഷിയോ സ്ഥാനാർത്ഥിയോ നടത്തിയാൽ അത് പെരുമാറ്റച്ചട്ട ലംഘനമായി കണക്കാക്കും.
ജാഥ നടത്താനുള്ള നിബന്ധനകൾ
മുൻകൂട്ടി നിശ്ചയിച്ച പരിപാടിയിൽ മാറ്റം വരുത്തരുത്. കൊവിഡ് മാനദണ്ഡങ്ങൾ പാലിക്കണം.
പരിപാടിയെപ്പറ്റി പൊലീസ് അധികാരികളെ മുൻകൂട്ടി അറിയിക്കണം. ജാഥ പോകേണ്ട പ്രദേശങ്ങളിൽ ഏതെങ്കിലും തരത്തിലുള്ള നിരോധന ഉത്തരവുകൾ പ്രാബല്യത്തിലുണ്ടോയെന്ന് സംഘാടകർ അന്വേഷിച്ച് നിരോധനങ്ങൾ ഉണ്ടെങ്കിൽ അവ പാലിക്കണം.
ഗതാഗത തടസമുണ്ടാക്കാൻ പാടുള്ളതല്ല. ജാഥകൾ റോഡിന്റെ വലതു വശത്ത് ക്രമപ്പെടുത്തണം. പൊലീസിന്റെ നിർദേശവും ഉപദേശവും കർശനമായി പാലിക്കണം.
രണ്ടോ അതിലധികമോ രാഷ്ട്രീയ പാർട്ടികളോ സ്ഥാനാർത്ഥികളോ ഏകദേശം ഒരേ സമയത്തുതന്നെ ഒരേ വഴിയിലൂടെയോ അതിന്റെ ഭാഗങ്ങളിലൂടെയോ ജാഥ നടത്തുന്നുണ്ടെങ്കിൽ സംഘാടകർ മുൻകൂട്ടി പരസ്പരം ബന്ധപ്പെടണം.
ജാഥകൾ തമ്മിലുള്ള സംഘട്ടനം ഒഴിവാക്കണം. സംഘർഷാവസ്ഥയ്ക്ക് കാരണമാകുന്ന സാധന സാമഗ്രികൾ ജാഥയിൽ പങ്കെടുക്കുന്നവർ ഉപയോഗിക്കരുത്.