പത്തനംതിട്ട: ആറന്മുളയിലെ എൽ.ഡി.എഫ് സ്ഥാനാർത്ഥിയുടെ നാമനിർദേശ പത്രികയിലെ പേര് വീണാകുര്യാക്കോസ് എന്നാണ്. വീണയുടെ പിതാവിന്റെ പേരാണ് ഒപ്പമുളളത്. ഇത് വോട്ടിംഗ് യന്ത്രത്തിൽ വീണാ ജോർജ് എന്നാക്കാൻ നാമനിർദേശ പത്രികയ്ക്കൊപ്പം അപേക്ഷ നൽകിയിട്ടുണ്ട്. വീണയുടെ ഭർത്താവിന്റെ പേര് ജോർജ് ജോസഫ് എന്നാണ്. നാട്ടിൽ അറിയപ്പെടുന്ന പേര് വോട്ടിംഗ് യന്ത്രത്തിൽ ഉൾപ്പെടുത്താൻ തിരഞ്ഞെടുപ്പ് കമ്മിഷൻ അനുമതി നൽകുന്നുണ്ട്. ഇതുപ്രകാരമാണ് വീണാകുര്യാക്കോസ് എന്ന പേര് വീണാജോർജ് എന്നാക്കി മാറ്റുന്നത്. ആറന്മുള നിയമസഭാ മണ്ഡലത്തിൽ 2016ലും പത്തനംതിട്ട പാർലമെന്റ് മണ്ഡലത്തിൽ 2019ലും മത്സരിച്ചപ്പോൾ വീണാകുര്യാക്കോസ് എന്നാണ് നാമനിർദേശ പത്രികയിൽ പേര് നൽകിയിരുന്നത്. അപേക്ഷ നൽകി വോട്ടിംഗ് യന്ത്രത്തിൽ വീണാജോർജ് എന്നാക്കിയിരുന്നു.