കോന്നി: മൈലപ്രയുടെ മണ്ണിൽ വോട്ട് തേടിയെത്തിയ എൽ.ഡി.എഫ് സ്ഥാനാർത്ഥി ജനീഷ് കുമാർ ഫുട്‌ബാൾ ഗ്രൗണ്ടിലിറങ്ങിയപ്പോൾ ഏറെ ആവേശത്തോടെയാണ് കളിക്കാർ വരവേ​റ്റത്. അപ്രതീക്ഷിതമായി എത്തിയ സ്ഥാനാർത്ഥിയെ കണ്ടപ്പോൾ കളിക്ക് അൽപം ഇടവേള നൽകി കളിക്കാരും സ്ഥാനാർത്ഥിക്കൊപ്പം കൂടി . സ്‌നേഹത്തോടെ വോട്ട് അഭ്യർത്ഥിച്ച സ്ഥാനാർത്ഥിയോട് തങ്ങൾക്കൊപ്പം അൽപനേരം പന്തുതട്ടാൻ ആവശ്യപ്പെട്ടു. യുവാക്കളുടെ ആവശ്യം കേട്ട സ്ഥാനാർത്ഥി അൽപനേരം കളിയിൽ മുഴുകിയപ്പോൾ കളിക്കാരും പ്രവർത്തകരും ആവേശത്തിലായി. സ്ഥാനാർത്ഥിക്ക് എല്ലാ പിന്തുണയും നൽകിയാണ് യുവാക്കൾ യാത്രയാക്കിയത്.

തുടർന്ന് നിരവധി പ്രവർത്തകർക്ക് ഒപ്പം ജനീഷ് കുമാർ മൈലപ്രയിലെ വ്യാപാര സ്ഥാപനങ്ങൾ സന്ദർശിച്ചു.