തിരുവല്ല: നിയമസഭാ തിരഞ്ഞെടുപ്പിന്റെ ഭാഗമായി പുളിക്കീഴ് പൊലീസ് സ്റ്റേഷൻ പരിധിയിലെ പ്രശ്നബാധിത മേഖലകളിൽ കേന്ദ്രസേന റൂട്ട് മാർച്ച് നടത്തി. ഇൻഡോ ടിബറ്റൻ ബോർഡർ പൊലീസ് സേനയിലെ 25 അംഗ സംഘമാണ് റൂട്ട് മാർച്ച് നടത്തിയത്. സ്റ്റേഷൻ പരിധിയിലെ പ്രശ്നബാധിത മേഖലകളായ പെരിങ്ങര ജംഗ്ഷൻ, നിരണം പഞ്ചായത്ത് മുക്ക്, ഡക്ക് ഫാം എന്നിവിടങ്ങളിലായിരുന്നു റൂട്ട് മാർച്ച്. പുളിക്കീഴ് എസ്.ഐമാരായ എ.പി അനീഷ്, സോമശേഖരൻ പിള്ള എന്നിവരുടെ നേതൃത്വത്തിലുള്ള പൊലീസ് സംഘവും റൂട്ട് മാർച്ചിന്റെ ഭാഗമായി. തിരഞ്ഞെടുപ്പ് വേളയിലടക്കം പ്രശ്നബാധിത മേഖലകളിൽ കേന്ദ്ര സേനയുടെ സാന്നിദ്ധ്യം ഉണ്ടാവുമെന്ന് സേനാ ഉദ്യോഗസ്ഥർ പറഞ്ഞു.