കൊല്ലം : ജില്ലയിൽ പൊതുജനങ്ങൾക്കുള്ള കൊവിഡ് പ്രതിരോധ വാക്‌സിൻ വിതരണത്തിനുള്ള രജിസ്‌ട്രേഷൻ ആരംഭിച്ചു. 60 വയസിന് മുകളിൽ പ്രായമുള്ളവർക്കും 45 - 60 പ്രായപരിധിയിൽ ഗുരുതര ആരോഗ്യപ്രശ്‌നങ്ങൾ നേരിടുന്നവർക്കുമാണ് ഒന്നാം ഘട്ടത്തിൽ വാക്‌സിൻ നൽകുന്നത്. തിരഞ്ഞെടുക്കപ്പെട്ട സർക്കാർ ആരോഗ്യകേന്ദ്രങ്ങളിൽ സൗജന്യമായി വാക്‌സിനെടുക്കാം. തിരഞ്ഞെടുക്കപ്പെട്ട സ്വകാര്യ ആശുപത്രികളിൽ സർക്കാർ നിശ്ചയിച്ചിട്ടുള്ള നിരക്കിൽ ഉടൻ വാക്‌സിൻ ലഭ്യമാക്കുമെന്ന് ജില്ലാ മെഡിക്കൽ ഓഫീസർ അറിയിച്ചു.
രജിസ്‌ട്രേഷൻ നിർബന്ധം
കൊവിഡ് പ്രതിരോധ വാക്‌സിൻ സ്വീകരിക്കാൻ രജിസ്‌ട്രേഷൻ നിർബന്ധമാണ്. പോർട്ടൽ വഴിയാണ് രജിസ്‌ട്രേഷൻ. നിലവിൽ വാക്‌സിൻ വിതരണ കേന്ദ്രത്തിൽ നേരിട്ടെത്തി രജിസ്റ്റർ ചെയ്യാൻ അനുവാദമില്ല. ഇതിനായി ആദ്യം മൊബൈൽ നമ്പർ രേഖപ്പെടുത്തണം. തുടർന്ന് ലഭിക്കുന്ന ഒ.ടി.പി ഉപയോഗിച്ച് രജിസ്‌ട്രേഷൻ നടത്താം. ഒരു മൊബൈൽ നമ്പർ ഉപയോഗിച്ച് നാലുപേർക്കുവരെ രജിസ്റ്റർ ചെയ്യാം. വാക്‌സിൻ സ്വീകരിക്കേണ്ടവരുടെ പേര്, പ്രായം, തിരിച്ചറിയൽ രേഖയുടെ വിവരങ്ങൾ തുടങ്ങിയവ രേഖപ്പെടുത്തണം.
45 - 60 പ്രായപരിധിയിലുള്ളവർ നിലവിൽ നേരിടുന്ന ഗുരുതര ആരോഗ്യപ്രശ്‌നം വ്യക്തമാക്കണം. പോർട്ടലിൽ ഉൾപ്പെടുത്തിയ രോഗങ്ങളുടെ പട്ടികയിൽ ബാധകമായവ സെലക്ട് ചെയ്യാം. രജിസ്‌ട്രേഷനുള്ള ഡോക്ടറുടെ നിശ്ചിത മാതൃകയിലുള്ള മെഡിക്കൽ സർട്ടിഫിക്കറ്റ് ഹാജരാക്കണം. സർട്ടിഫിക്കറ്റിന്റെ മാതൃക പോർട്ടലിൽ ലഭിക്കും. സംസ്ഥാനം, ജില്ല എന്നിവ തിരഞ്ഞെടുത്താൽ വാക്‌സിൻ ലഭിക്കുന്ന കേന്ദ്രവും കണ്ടെത്താം. രജിസ്റ്റർ ചെയ്തവർക്ക് വാക്‌സിനേഷൻ സംബന്ധിച്ച അറിയിപ്പ് എസ്.എം.എസ് മുഖേനെ ലഭിക്കും. 60 വയസിന് മുകളിൽ പ്രായമുള്ളവർക്ക് രജിസ്റ്റർ ചെയ്യുമ്പോൾ നൽകിയ തിരിച്ചറിയൽ രേഖയുമായി വാക്‌സിൻ സ്വീകരിക്കാം. 45 - 60 പ്രായപരിധിയിൽ ഉള്ളവർ തിരിച്ചറിയൽ രേഖയ്‌ക്കൊപ്പം മെഡിക്കൽ സർട്ടിഫിക്കറ്റുകൂടി ഹാജരാക്കണം.
പരിശോധന ചൊവ്വ, വെള്ളി ദിവസങ്ങളിൽ
ടി.എം. വർഗീസ് ഹാളിൽ നടത്തിയിരുന്ന കൊവിഡ് പരിശോധന ഇനി കൊല്ലം ലാൽ ബഹദൂർ ശാസ്ത്രി സ്റ്റേഡിയം ഭവനിൽ ചൊവ്വ, വെള്ളി ദിവസങ്ങളിൽ നടക്കും. നിയമസഭാ തിരഞ്ഞെടുപ്പുമായി ബന്ധപ്പെട്ട പരിശീലന പരിപാടികൾ നടക്കുന്നതിനാൽ മറ്റൊരറിയിപ്പുണ്ടാകുന്നതുവരെ ക്രമീകരണം തുടരുമെന്ന് ജില്ലാ മെഡിക്കൽ ഓഫീസർ അറിയിച്ചു.