കടയ്ക്കൽ : കൊവിഡ് പ്രതിസന്ധിയിൽ മികച്ച ഇടപെടൽ നടത്തിയ പ്രാഥമിക സഹകരണ സംഘങ്ങൾക്ക് കേരള ബാങ്ക് സംസ്ഥാന തലത്തിൽ ഏർപ്പെടുത്തിയ പുരസ്കാരം കടയ്ക്കൽ സർവീസ് സഹകരണ ബാങ്ക് പ്രസിഡന്റ് എസ്. വിക്രമൻ കേരളാ ബാങ്ക് പ്രസിഡന്റ് ഗോപി കോട്ടമുറിക്കലിൽ നിന്ന് ഏറ്റുവാങ്ങി. ഒരു ലക്ഷം രൂപയും പ്രശംസാപത്രവും മൊമന്റോയുമsങ്ങുന്നതാണ് പുരസ്കാരം. മികച്ച സാമൂഹ്യ പ്രവർത്തനങ്ങളും സാധാരണക്കാരന്റെ സാമ്പത്തിക ഭദ്രത ഉറപ്പാക്കുന്നതിന് നടത്തിയ വിവിധ സാമ്പത്തിക ഇടപെടലുകളുമാണ് അവാർഡ് നിർണയത്തിൽ ബാങ്കിനെ ഒന്നാം സ്ഥാനത്തെത്തിച്ചത്. കാർഷിക - കാർഷികാനുബന്ധ മേഖലയിലെ പ്രവർത്തനം, സുഭിക്ഷ കേരളം പദ്ധതിയുടെ നിർവഹണം, ദുരിതാശ്വാസ സഹായങ്ങൾ, കമ്മ്യൂണിറ്റി കിച്ചൺ പ്രവർത്തനം, കാർഷിക സംരംഭ മേഖലയിലെ വായ്പാ വിതരണം, മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകിയ സംഭാവന, പ്രാഥമിക സംഘങ്ങളുടെ സ്വന്തം ഫണ്ടുപയോഗിച്ചുള്ള ബ്രേക്ക് ദ ചെയിൻ കാമ്പയിനുകൾ തുടങ്ങിയവ പരിഗണിച്ചാണ് അവാർഡ് നൽകിയത്.