കൊരട്ടി: ഗ്രീൻ കൊരട്ടി കെയർ കൊരട്ടി പദ്ധതിയുടെ ഭാഗമായി പഞ്ചായത്തിലെ പൊതു ഇടങ്ങളിലെയും സർക്കാർ സ്ഥാപനങ്ങളിലെ മരങ്ങൾക്കും ജിയോ ടാഗ് ആധാർ കാർഡ് പദ്ധതി ഒരുങ്ങി. ആദ്യഘട്ടത്തിൽ പഴയ എൻ.എച്ച് റോഡ്, പഞ്ചായത്ത്, വില്ലേജ് ഓഫീസ്, മൃഗാശുപത്രി എന്നിവിടങ്ങളിലെ മരങ്ങൾക്കാണ് ജിയോ ടാഗ് ഒരുക്കുന്നത്. നാലുക്കെട്ട് എസ്.സി.എം.എസ് കോളേജും, ഉന്നത് ഭാരത് അഭിയാൻ എന്നിവയുമായി സഹകരിച്ചാണ് പഞ്ചായത്ത് പദ്ധതി ആവിഷ്‌ക്കരിച്ചത്. മരങ്ങളുടെ പേര്, ശാസ്ത്രീയ നാമം, ഉത്ഭവം, പഴക്കം, ആയുസ്, മരത്തിന്റെ ഗുണങ്ങൾ, ഉപയോഗങ്ങൾ എന്നിവയെല്ലാം ക്യൂ ആർ കോഡ് ഉപയോഗിച്ച് സ്‌കാൻ ചെയ്താൽ ലഭ്യമാവുന്ന വിധത്തിൽ ആണ് സൗകര്യം ഒരുക്കിയിട്ടുള്ളത്. മരങ്ങളുടെയും അതുവഴി പരിസ്ഥിതിയുടെയും സംരക്ഷണം ലക്ഷ്യമാക്കിയാണ് ഇത്തരത്തിലുള്ള ഒരു പദ്ധതിക്ക് കേന്ദ്ര സർക്കാരിന്റെ ഉന്നത് ഭാരത് അഭിയാൻ തുടക്കമിടുന്നത്.

സംസ്ഥാനത്ത് ആദ്യമായി ഒരു പഞ്ചായത്ത് ആരംഭിക്കുന്ന ഈ പദ്ധതിയുടെ ഉദ്ഘാടനം പഞ്ചായത്ത് പ്രസിഡന്റ് പി.സി. ബിജു നിർവഹിച്ചു. എസ്.സി.എം.എസ് കോളേജ് പ്രിൻസിപ്പൽ ഡോ.പ്രവീൺ സാനി അദ്ധ്യക്ഷത വഹിച്ചു. എസ്.സി.എം.എസ് കോളേജ് വാട്ടർ മാനേജ്‌മെന്റ് വകുപ്പ് തലവൻ ഡോ.സണ്ണി ജോർജ്ജ് പദ്ധതി വിശദികരിച്ചു. പഞ്ചായത്ത് വൈസ് പ്രസിഡന്റ് ഷൈനി ഷാജി, സ്ഥിരം സമതി ചെയർമാൻമാരായ അഡ്വ.കെ.ആർ. സുമേഷ്, നൈനു റിച്ചു, ഡോ.രാകേഷ് നാൻ, ഡോ.രാജേഷ് എന്നിവർ സംസാരിച്ചു.