ഗുരുവായൂർ: ഗുരുവായൂരിൽ യു.ഡി.എഫ് സ്ഥാനാർത്ഥി കെ.എൻ.എ. ഖാദർ ജയിക്കണമെന്ന സുരേഷ് ഗോപിയുടെ പരാമർശം ദൗർഭാഗ്യകരമാണെന്നും സുരേഷ് ഗോപി അത്തരം പരാമർശം നടത്താൻ പാടില്ലായിരുന്നുവെന്നും ഗുരുവായൂരിലെ എൻ.ഡി.എ സ്ഥാനാർഥി ദിലീപ് നായർ. ബി.ജെ.പി പ്രവർത്തകരെ ഒപ്പം നിറുത്താൻ തനിക്ക് സാധിച്ചുവെന്നും ഒറ്റക്കെട്ടായാണ് മുന്നോട്ട് പോകുന്നതെന്നും ദിലീപ് പ്രതികരിച്ചു.

നാമനിർദേശ പത്രിക തള്ളിയത് കാരണം ബി.ജെ.പിക്ക് സ്ഥാനാർത്ഥികളില്ലാത്ത ഗുരുവായൂരിൽ യു.ഡി.എഫ് സ്ഥാനാർത്ഥി കെ.എൻ.എ. ഖാദർ ജയിക്കണമെന്നും തലശ്ശേരിയിൽ എൽ.ഡി.എഫ് സ്ഥാനാർത്ഥി എ.എൻ. ഷംസീർ ഒരു കാരണവശാലും ജയിക്കരുതെന്നുമായിരുന്നു സുരേഷ് ഗോപിയുടെ പരാമർശം.

എന്നാൽ ഗുരുവായൂരിൽ ബി.ജെ.പി സ്ഥാനാർത്ഥിയുടെ പത്രിക തള്ളിയതോടെ ഡി.എസ്.ജെ.പി സ്ഥാനാർത്ഥി ദിലീപ് നായരെ പിന്തുണയ്ക്കാൻ ബി.ജെ.പി നേതൃത്വം തീരുമാനിച്ചിരുന്നു. ഇതിന് വിരുദ്ധമായി നടത്തിയ സുരേഷ് ഗോപിയുടെ പ്രതികരണത്തിൽ ബി.ജെ.പി നേതൃത്വവും കടുത്ത അമർഷത്തിലാണ്.