സീ യു സൂണിനു ശേഷം കുഞ്ചാക്കോ ബോബൻ കേന്ദ്ര കഥാപാത്രമായി എത്തുന്ന 'അറിയിപ്പു'മായി മഹേഷ് നാരായണൻ. കുഞ്ചാക്കോ ബോബന്റേതായി 2021ൽ വരാനിരിക്കുന്ന പല സിനിമകളും ഈ വർഷം പ്രേക്ഷകർ ഏറ്റവുമധികം കാത്തിരിക്കുന്ന പ്രൊജക്ടുകളാണ്. ടേക്ക് ഓഫിന് ശേഷം മഹേഷ് നാരായണന്റെ സംവിധാനത്തിൽ കുഞ്ചാക്കോ ബോബൻ അഭിനയിക്കുന്ന ചിത്രവുമാണ് 'അറിയിപ്പ്'. ഷെബിൻ ബക്കറും മഹേഷ് നാരായണനുമൊപ്പം ചാക്കോച്ചനും നിർമ്മാണ പങ്കാളിയാകുന്നു. 2021 ജൂണിൽ ചിത്രീകരണം തുടങ്ങും. എറണാകുളമാണ് പ്രധാന ലൊക്കേഷൻ. ഫഹദ് ഫാസിലിനെ നായകനാക്കി സജിമോൻ പ്രഭാകരൻ സംവിധാനം ചെയ്യുന്ന 'മലയൻകുഞ്ഞ്' എന്ന സിനിമയുടെ രചനയും ക്യാമറയും എഡിറ്റിംഗും മഹേഷ് നാരായണനാണ്. ഈ ചിത്രത്തിന് ശേഷം 'അറിയിപ്പ് ' പ്രീ പ്രൊഡക്ഷനിലേക്ക് കടക്കും. മേയ് റിലീസായ 'മാലിക്ക്' ആണ് മഹേഷ് നാരായണന്റെ അടുത്ത ചിത്രം. മാർട്ടിൻ പ്രക്കാട്ടിന്റെ 'നായാട്ട്', അപ്പു ഭട്ടതിരിയുടെ 'നിഴൽ', അഷറഫ് ഹംസ സംവിധാനം ചെയ്യുന്ന ഭീമന്റെ വഴി എന്നിവയാണ് കുഞ്ചാക്കോ ബോബന്റേതായി വരാനിരിക്കുന്ന മറ്റ് ചിത്രങ്ങൾ.