സ്ത്രീപുരുഷ ഭേദമെന്യേ എല്ലാ പ്രായക്കാരിലും കണ്ടുവരുന്ന ഒന്നാണ് മൂത്ര നിയന്ത്രണമില്ലായ്മ. അർജ് ഇൻകോണ്ടിനൻസ്, സ്ട്രെസ് ഇൻകോണ്ടിനൻസ്, ഓവർഫ്ളോ ഇൻകോണ്ടിനൻസ്, ട്രൂ ഇൻകോണ്ടിനൻസ് എന്നിങ്ങനെ ഇത് നാലു തരത്തിലുണ്ട്.

അർജ് ഇൻകോണ്ടിനൻസിൽ മൂത്ര സഞ്ചിയിലുണ്ടാകുന്ന ഇടവിട്ടുള്ള സങ്കോചം കാരണം പെട്ടെന്ന് മൂത്രമൊഴിക്കണമെന്ന് തോന്നുന്നു. ചിലരിൽ മൂത്രം അറിയാതെ പോകുന്നു. മൂത്രരോഗാണുബാധ, മൂത്ര തടസം, പക്ഷാഘാതം, തലച്ചോറിന്റെ അസുഖങ്ങൾ മുതലായവകാരണമാണ് ഇത്തരം മൂത്രനിയന്ത്രണമില്ലായ്മ ഉണ്ടാകുന്നത്.

സ്ട്രെസ് ഇൻകോണ്ടിനൻസുള്ള രോഗികളിൽ തുമ്മുകയും ചുമയ്ക്കുകയും ചെയ്യുമ്പോൾ മൂത്രം അറിയാതെ പോകുന്നു. പ്രയാസമേറിയ പ്രസവം കഴിഞ്ഞ സ്ത്രീകൾ, നാഡീവ്യവസ്ഥയിലെ രോഗങ്ങൾ, പ്രോസ്റ്റേറ്റ് ഗ്രന്ഥിയുടെ ഓപ്പറേഷൻ കഴിഞ്ഞ രോഗികൾ മുതലായവരിൽ ഇൗ അവസ്ഥ കണ്ടുവരുന്നു.

മൂത്രതടസ്സം കാരണം മൂത്രം കെട്ടി നിൽക്കുന്ന രോഗികളിൽ അത് കവിഞ്ഞ് ഒഴുകുന്നതിനാണ് ഒാവർ ഫ്ളോ ഇൻകോണ്ടിനൻസ് എന്ന് പറയുന്നത്.

പുരുഷന്മാരിൽ പ്രോസ്റ്റേറ്റ് ഗ്രന്ഥിയുടെ വീക്കം, മൂത്രനാളിയുടെ സ്ട്രക്ചർ അസുഖം മുതലായവകാരണം തടസ്സം ഉണ്ടാവുകയും മൂത്രം കവിഞ്ഞ് ഒഴുകുകയും ചെയ്യുന്നു. സ്ത്രീകളിൽ ഗർഭാശയ മുഖത്തെ മുഴകൾ, അടിവയറ്റിലെ മറ്റു മുഴകൾ, അടിവയറ്റിലെ അവയവങ്ങൾ വെളിയിലേക്ക് തള്ളിവരുന്ന അവസ്ഥ, മലബന്ധം മുതലായവ കാരണം മൂത്രം പോകാതെ കെട്ടി നിൽക്കാം. ഇവരിൽ മൂത്രം കവിഞ്ഞ് ഒഴുകുന്നു.

മൂത്രനിയന്ത്രണ മാംസപേശിയുടെ തകരാർ കാരണമുള്ള നിയന്ത്രണമില്ലായ്മയെയാണ് ട്രൂ ഇൻകോണ്ടിനൻസ് എന്നുപറയുന്നത്. പ്രോസ്റ്റേറ്റ് സർജറി, പ്രോസ്റ്റേറ്റ് കാൻസറിനുള്ള റാഡിക്കൽ പ്രോസ്റ്റാറ്റെക്ടമി മുതലായവ മൂത്ര നിയന്ത്രണ മാംസപേശിക്ക് തകരാർ ഉണ്ടാവുകയും മൂത്ര നിയന്ത്രണം നഷ്ടപ്പെടുകയും ചെയ്യുന്നു.

പരിശോധനയും ചികിത്സയും

മൂത്രപരിശോധനയിലൂടെ രോഗാണുബാധ ഉണ്ടോയെന്ന് മനസ്സിലാക്കാൻ സാധിക്കും. അനുബന്ധ രോഗമായ പ്രമേഹം രക്തപരിശോധനയിലൂടെയും മനസിലാക്കാനും കഴിയും.

അൾട്രാസൗണ്ട് സ്കാൻ പരിശോധന വഴി മൂത്രം കെട്ടിനിൽക്കുന്നത് മനസിലാക്കാം. യൂറോ ഡയനാമിക് പരിശോധനകൾ മൂത്ര സഞ്ചി, മൂത്രനിയന്ത്രണ മാംസപേശി മുതലായവയെക്കുറിച്ച് പഠിക്കാൻ സഹായകരമാണ്.

അർജ് ഇൻകോണ്ടിനൻസിന് ഫലപ്രദമായ ആന്റികോളിനെർജിക് വിഭാഗത്തിൽപ്പെട്ട മരുന്നുകൾ, ബീറ്റാ 3 അഗണിസ്റ്റ് മുതലായ മരുന്നുകൾ ഒറ്റയ്ക്കോ ഒരുമിച്ചോ രോഗിക്ക് കൊടുക്കുന്നു. മൂത്ര സഞ്ചിയിൽ കുത്തിവയ്ക്കുന്ന ഒണബോട്ടുലിനം ടോക്സിൻ ഇൗ അസുഖത്തിന് ഫലപ്രദമാണ്. ന്യൂറോമൊഡ്യൂലേഷൻ ചികിത്സയും ഇത്തരം രോഗികളിൽ ഫലം ചെയ്യും.

സ്ട്രെസ് ഇൻകോണ്ടിനൻസിന് ഫലപ്രദമായ ശസ്ത്രക്രിയകളാണ് ടി.വി.ടി, ടി.ഒ.ടി

മുതലായവ.

ഓവർഫ്ളോ ഇൻകോണ്ടിനൻസിന് മൂത്ര തടസം നീക്കം ചെയ്യണം. പുരുഷന്മാരിൽ പ്രോസ്റ്റേറ്റ് വീക്കത്തിൽ ടി.ഒ.ആർ.പി, പ്രോസ്റ്റേറ്റ് കാൻസറിന് റാഡിക്കൽ പ്രോസ്റ്റാറ്റെക്ടമി മുതലായവ വേണ്ടിവരും.

മൂത്ര നിയന്ത്രണ മാംസപേശിയുടെ തകരാർ കാരണമുള്ള ട്രൂ ഇൻകോണ്ടിനൻസിന് ആർട്ടിഫിഷ്യൽ യൂറിനറി സ് ഫിംഗ്ടർ ശസ്ത്രക്രിയയാണ് ഗോൾഡ് സ്റ്റാൻഡേർസ്. വിദേശ രാജ്യങ്ങളിൽ മാത്രം ലഭ്യമായിരുന്ന ഇൗ ചികിത്സ ഇപ്പോൾ കേരളത്തിലും ലഭ്യമാണ്.