ലൈസ പ്രൊഡക്ഷൻസിനു വേണ്ടി ലൈസതെരേസ നിർമ്മിക്കുന്ന ക്യാബിൻ എന്ന ചിത്രം നവാഗതനായ പുലരി ബഷീർ രചനയും സംവിധാനവും നിർവഹിക്കുന്നു. ചിത്രീകരണം പൂർത്തിയായ ചിത്രം ഉടൻ തിയേറ്ററിലെത്തും. തമിഴ് ചിത്രങ്ങളിലൂടെ ശ്രദ്ധേയനായ പ്രിൻസ്, ജോയ് മാത്യു എന്നിവർ പ്രധാന വേഷത്തിലെത്തുന്ന ക്യാബിൻ വ്യത്യസ്തമായ ഒരു റോഡ് മൂവിയാണ്. മുപ്പത്തിയഞ്ച് വർഷമായി നീലഗിരി എസ്റ്റേറ്റിൽ സൂപ്പർവൈസറാണ് ശങ്കരൻ മേസ്തിരി (ജോയ് മാത്യു) ജോലിയിൽ നിന്ന് പിരിഞ്ഞതോടെ നാട്ടിലേക്ക് താമസം മാറ്റാൻ തീരുമാനിച്ച ശങ്കരൻ മേസ്തിരി ഭാര്യയും മകളും ഒത്ത് വീട്ട് സാധനങ്ങളുമായി നാട്ടിലേക്ക് യാത്ര പുറപ്പെട്ടു. ഒരു ലോറിയിൽ കയറി വളരെ ബുദ്ധിമുട്ടിയായിരുന്നു യാത്ര. മൂക്ക് മുട്ടെ മദ്യപിച്ചിരുന്ന ലോറി ഡ്രൈവറുടെ മകളിലേക്കുള്ള ഒളിഞ്ഞു നോട്ടങ്ങൾ ശങ്കരൻ മേസ്തിരിക്ക് സഹിക്കാൻ കഴിഞ്ഞില്ല. എങ്കിലും എല്ലാം സഹിച്ച് അയാൾ യാത്ര ചെയ്തു. നാട്ടിലെത്തിയപ്പോഴാണ് മനസിലായത്, തനിക്ക് സ്വന്തമായിട്ടുണ്ടായിരുന്ന വീടും പുരയിടവും ബന്ധുക്കൾ അപഹരിച്ചെന്ന്. ഭാര്യയും മകളുമായി എങ്ങോട്ടു പോകണമെന്നറിയാതെ കുഴഞ്ഞ ശങ്കരൻ മേസ്തിക്ക് അപ്പോൾ തുണയായി ഡ്രൈവർ ദേവരാജ് എത്തി. മനസില്ലാ മനസോടെയാണെങ്കിലും ശങ്കരൻ മേസ്തിരി ദേവരാജിനൊപ്പം യാത്രയായി. തുടർന്ന് ശങ്കരൻ മേസ്തിരിയുടെയും ഡ്രൈവർ ദേവരാജിന്റെയും ജീവിതത്തിൽ നടന്ന ഞെട്ടിപ്പിക്കുന്ന സംഭവങ്ങൾ അവതരിപ്പിക്കുകയാണ് ക്യാബിൻ എന്ന ചിത്രം. ഛായാഗ്രഹണം: ബൊറ്റ ബാല ഭരണി, ഗാനരചന: ഷഹീറ നസീർ, ജോ പോൾ, കൃഷ്ണകുമാർ, സംഗീതം: ഹിഷാം അബ്ദുൾ വഹാബ്, ആലാപനം: നജീം അർഷാദ്, ഹരിശങ്കർ, മുകേഷ്, ഹിഷാം അബ്ദുൾ വഹാബ്, ലൈസതെരേസ. എഡിറ്റർ: ശ്രീനിവാസ്. അസോസിയേറ്റ് ഡയറക്ടർ: നാസർ. പി.ആർ.ഒ: അയ്മനം സാജൻ. ജോയ് മാത്യു, പ്രിൻസ്, കൈലേഷ്, മാമുക്കോയ, ജാഫർ ഇടുക്കി, ഷിയാസ് കരീം, ജയ് താക്കൂർ, സലാം ബാപ്പു, പ്രകാശ് പയ്യാനക്കൽ, ലെവിൻ, ഹരിശ്രീ യൂസഫ്, ശംസു, അബൂൽ അഹല, റോണ ജോ, അംബികാ മോഹൻ, കുളപ്പുള്ളി ലീല, നീനാ കുറുപ്പ്, അഷത വരുൺ, ധനം കോവൈ, സുകന്യ കൃഷ്ണ, കല, ലൈല എന്നിവർ അഭിനയിക്കുന്നു.