തിരുവനന്തപുരം: യുവജനങ്ങളും കന്നി വോട്ടർമാരും തിരഞ്ഞെടുപ്പിനെ കൂടുതൽ ഗൗരവത്തോടെ സമീപിക്കണമെന്നും കേരളത്തിലെ ജനങ്ങൾ പൊതുവേ തിരഞ്ഞെടുപ്പിന്റെ പ്രാധാന്യത്തെപ്പറ്റി പൂർണ ബോധമുള്ളവരാണെന്നും മുഖ്യ തിരഞ്ഞെടുപ്പ് ഓഫീസർ ടിക്കാറാം മീണ പറഞ്ഞു. മ്യൂസിയം റേഡിയോ പാർക്കിൽ സ്വീപും ശുചിത്വ മിഷനും സംയുക്തമായി സജ്ജീകരിച്ച മാതൃകാ ഹരിത പോളിംഗ് ബൂത്ത് ഉദ്ഘാടനം ചെയ്യുകയായിരുന്നു അദ്ദേഹം.

തിരഞ്ഞെടുപ്പിലെ ഹരിതചട്ടം സംബന്ധിച്ച് പൊതുജനങ്ങൾക്ക് അവബോധം നൽകുന്നതിനായാണ് മാതൃകാ പോളിംഗ് ബൂത്ത് സജ്ജീകരിച്ചിരിക്കുന്നത്. ഏപ്രിൽ ആറുവരെ മാതൃകാ പോളിംഗ് ബൂത്ത് പൊതുജനങ്ങൾക്ക് സന്ദർശിക്കാം. രാവിലെ 10 മുതൽ വൈകിട്ട് ഏഴുവരെയാണ് ബൂത്ത് പ്രവർത്തിക്കുക. കൊവിഡിന്റെ സാഹചര്യത്തിൽ പോളിംഗ് ബൂത്തിലുണ്ടാകുന്ന ബയോമെഡിക്കൽ വേസ്റ്റ് ഉൾപ്പെടെയുള്ളവ തരംതിരിച്ച് ശേഖരിച്ച് നിർമാർജനം ചെയ്യുന്നത് എങ്ങനെയെന്നും മനസിലാക്കാം. മോക്ക് ഇലക്ട്രോണിക് വോട്ടിംഗ് യന്ത്രവും ബൂത്തിൽ സജ്ജീകരിച്ചിട്ടുണ്ട്. മ്യൂസിയം റേഡിയോ പാർക്കിൽ നടന്ന ചടങ്ങിൽ ജില്ലാ കളക്ടർ ഡോ. നവജ്യോത് ഖോസ അദ്ധ്യക്ഷത വഹിച്ചു. ജില്ലാ വികസന കമ്മീഷണർ വിനയ് ഗോയൽ, തിരഞ്ഞെടുപ്പ് നിരീക്ഷകരായ എച്ച്. അരുൺ കുമാർ, പർനീത് സെർഗിൽ, ചന്ദ്രേഷ് കുമാർ യാദവ്, എച്ച്.കെ. ശർമ്മ, സുശീൽ ശരവൺ, എൻ.എം. ശങ്കർ റാവു, സബ് കളക്ടർ എം.എസ്. മാധവിക്കുട്ടി, സ്വീപ്, ശുചിത്വ മിഷൻ ഉദ്യോഗസ്ഥർ തുടങ്ങിയവർ പങ്കെടുത്തു.