മൂത്രത്തിൽ ചുവന്ന രക്താണുക്കൾ (ആർ.ബി.സി) 3 ൽ അധികം മൈക്രോസ്കോപ്പിൽ കാണുകയാണെങ്കിൽ അത് തീർച്ചയായും കൂടുതൽ പരിശോധന അർഹിക്കുന്നു. ദീർഘമായ രോഗചരിത്രം, വിശദമായ പരിശോധന, ലബോറട്ടറി പരിശോധനകൾ മുതലായവ അത്യാവശ്യമാണ്.

മൂത്രരോഗാണുബാധ, ആർത്തവം, കഠിനവ്യായാമം, വൈറൽ പനി, വൃക്ക അസുഖങ്ങൾ, അപകടം വഴിയുള്ള ക്ഷതം, യൂറോളജിക്കൽ ശസ്ത്രക്രിയകൾ മുതലായവ കാരണം മൂത്രത്തിൽ രക്തം പ്രകടമാവാം.

ആദ്യ പരിശോധനയിൽ വൃക്കയുടെ പ്രവർത്തനം മനസിലാക്കണം. യൂറിയ, ക്രിയേറ്റിനിൻ, ഇ.ജി.ആർ.എഫ് മുതലായ പരിശോധനകൾ വൃക്കയുടെ പ്രവർത്തനത്തിന്റെ ചൂണ്ടുപലകയാണ്. ഡിസ്കോർഫിക്ക് ആ.ബി.സി,

മൂത്രത്തി​ൽ പ്രോട്ടീൻ, കാസ്റ്റ്, മുതലായവ മെഡി​ക്കൽ വൃക്ക അസുഖങ്ങൾ കണ്ടുപി​ടി​ക്കാൻ സഹായി​ക്കും. ആന്റി​ കൊയാഗുലന്റ് മരുന്നുകൾ കഴി​ക്കുന്ന രോഗി​കളി​ൽ മൂത്രത്തി​ൽ രക്തം കാണുകയാണെങ്കി​ൽ വി​ശദമായ പരി​ശോധന തീർച്ചയായും ചെയ്യണം.

മൂത്രത്തി​ൽ രക്തം കാണുന്ന രോഗി​കൾ 35 വയസി​ന് മുകളി​ലുള്ളവർക്ക് സി​സ്റ്റോസ്കോപ്പി​ പരി​ശോധന തീർച്ചയായും ചെയ്യണം. 35 വയസിന് താഴെയുള്ളവർക്ക് രോഗത്തിന്റെ സ്വഭാവമനുസരിച്ച് സിസ്റ്റോസ്കോപ്പി വേണമോ എന്ന് യൂറോളജിസ്റ്റ് നിശ്ചയിക്കും. പുകവലിക്കുന്നവൻ, കെമിക്കൽ വ്യവസായവുമായി ബന്ധപ്പെട്ടവർ, മൂത്രമൊഴിക്കുന്നതുമായി ബന്ധപ്പെട്ട രോഗലക്ഷണമുള്ളവർ മുതലായവർക്ക് മൂത്ര വ്യവസ്ഥയിലെ കാൻസറിനുള്ള സാദ്ധ്യത കൂടുതലാണ്. ഇത്തരക്കാർക്ക് സിസ്റ്റോസ്കോപ്പി പരിശോധന തീർച്ചയായും വേണ്ടിവരും.

മൂത്രത്തിൽ രക്തം കാണുന്ന രോഗികൾക്ക് റേഡിയോളജി പരിശോധനകൾ ആവശ്യമാണ്. മൾട്ടി ഫേസിക് സി.ടി സ്കാൻ അത്യാവശ്യമായി ചെയ്തിരിക്കണം.

വൃക്ക പരാജയം, അലർജിയുള്ളവർ, ഗർഭിണികൾ മുതലായവരിൽ സി.ടി സ്കാൻ പരിശോധന പാടില്ല. ഇത്തരക്കാർക്ക് എം.ആർ.എെ പരിശോധനയാണ് അഭികാമ്യം.

വൃക്ക പരാജയം, അലർജി മുതലായ സാഹചര്യങ്ങളിൽ വൃക്കയുടെ വിശദമായ ഘടനാപരമായ കാര്യങ്ങൾ അറിയാൻ ആർ.ജി.പി പരിശോധന സഹായിക്കും. ശരീരത്തിനകത്ത് മെറ്റൽ ഇംപ്ളാന്റുകളുള്ള രോഗികൾക്ക് എം.ആർ.എെ പരിശോധന ചെയ്യാൻ സാദ്ധ്യമല്ല. ഇത്തരക്കാർക്കും ആർ.ജി.പി പരിശോധന വൃക്കയുടെ വിശദമായ കാര്യങ്ങൾ അറിയാൻ സഹായിക്കും.

പുകവലിക്കുന്നവർ, കെമിക്കൽ വ്യവസായങ്ങളുമായി ബന്ധപ്പെട്ടവർ മുതലായവർക്ക് മൂത്രത്തിൽ രക്തം കാണുകയാണെങ്കിൽ മൂത്രത്തിന്റെ സൈറ്റോളജി പരിശോധന വേണ്ടിവരും.

മൂത്രത്തിൽ രക്തം കാണുന്ന രോഗികൾക്ക് എല്ലാ പരിശോധനകളും നെഗറ്റീവ് ആണെങ്കിൽ വർഷത്തിൽ ഒരിക്കൽ വിശദമായ മൂത്രപരിശോധന നടത്തേണ്ടതാണ്. ഇത്തരം രോഗികൾക്ക് വിശദമായ യൂറോളജി പരിശോധനകൾ (റേഡിയോളജി) 3 വർഷത്തിലൊരിക്കൽ നടത്തുന്നത് നല്ലതാണ്.