പല്ലിലും മോണയിലും വായ്ക്കുള്ളിലും പറ്റിപ്പിടിച്ചിരിക്കുന്ന ഭക്ഷണവസ്തുക്കൾ കാരണമുള്ള ബാക്ടീരിയ, പുകയില ഉൽപ്പന്നങ്ങൾ, പുകവലി, ശരിയായി വൃത്തിയാക്കാത്ത വായ, ദന്തരോഗങ്ങൾ, വായ വരൾച്ച, പ്രമേഹം, കുടൽ രോഗങ്ങൾ, അർശസ്, ചില മരുന്നുകൾ, വായ്ക്കുള്ളിലെ അണുബാധ, ടോൺസിലൈറ്റിസ്, സൈനസൈറ്റിസ് തുടങ്ങിയവയാണ് വായ് നാറ്റത്തിന്റെ കാരണങ്ങൾ. വായ് നാറ്റം വർദ്ധിച്ചാൽ ചീഞ്ഞ മുട്ടയുടെ ഗന്ധംപോലെ അനുഭവപ്പെടാം.

ശരിയായി പല്ലുതേയ്ക്കുക, ഭക്ഷണാവശിഷ്ടങ്ങൾ നീക്കി വായ വൃത്തിയാക്കുക,വായ ഈർപ്പമുള്ളതാക്കി സൂക്ഷിക്കുക എന്നിവയാണ് വായ് നാറ്റം തടയാനുള്ള പരിഹാരമാർഗങ്ങൾ.

സോഫ്റ്റ് അഥവാ മൃദുവായ ബ്രഷുകൾ വേണം പല്ല് തേയ്ക്കാൻ ഉപയോഗിക്കേണ്ടത്. മൂന്നുമാസമാകുമ്പോഴോ അതിനുമുമ്പ് ബ്രിസ്സിൽസ് വളഞ്ഞു തുടങ്ങുമ്പോഴോ ബ്രഷ് മാറ്റുക.
മൂർച്ചയുള്ള വസ്തുക്കൾ ഉപയോഗിച്ച് പല്ലിട കുത്തുന്നത് നല്ലതല്ല. പ്രത്യേക നൂൽ ഉപയോഗിച്ച് ഫ്ളോസ്സ് ചെയ്യുകയാണ് വേണ്ടത്. വേപ്പിലത്തണ്ട് ഉപയോഗിച്ച് ഭക്ഷണശകലങ്ങൾ സൂക്ഷ്മതയോടെ മാറ്റുന്നത് വായിൽ ബാധിക്കാനിടയുള്ള അണുബാധയെ അകറ്റിനിറുത്തും.

ചൂടാക്കി തണുപ്പിച്ച വെള്ളം, കഷായങ്ങൾ, ആട്ടിയ വെളിച്ചെണ്ണ എന്നിവ കവിൾ കൊള്ളുന്നതും വായ അധികമായി ഉണങ്ങുന്നുണ്ടെങ്കിൽ അതിന്റെ കാരണം കണ്ടെത്തി ചികിത്സ ചെയ്യുന്നതും അനിവാര്യമാണ്.

ഗ്യാസ്ട്രോ ഇസോഫാജിയൽ റിഫ്ളക്സ് ഡിസീസ് അഥവാ ജി.ഇ.ആർ.ഡി പോലുള്ള ചില ദഹനപ്രശ്നങ്ങൾ കാരണം ആമാശയത്തിൽ നിന്ന് ശരിയായി ദഹിക്കാത്ത ഭക്ഷണവും ആസിഡും ദഹനരസങ്ങളും ഏമ്പക്കത്തിനൊപ്പം പുറന്തള്ളുന്നതും വായ്‌നാറ്റത്തിന് കാരണമാകാറുണ്ട്.

ശ്രദ്ധിക്കാൻ

ഭക്ഷണം കഴിച്ചശേഷം വായ ശരിയായി വൃത്തിയാക്കണം. രണ്ടു നേരമെങ്കിലും ബ്രഷ് ഉപയോഗിച്ച് പല്ലുതേയ്ക്കണം. ഭക്ഷണാവശിഷ്ടങ്ങൾ പല്ലിനിടയിൽ നിന്ന് മാറ്റുക. കുടുങ്ങിയിരിക്കുന്ന ഭക്ഷണവസ്തുക്കൾ ഒരു നേരമെങ്കിലും ഫ്ളോസ് ഉപയോഗിച്ചു മാറ്റുക. നാവ് വടിക്കുക. വായ ഉണങ്ങാൻ അനുവദിക്കരുത്. വയ്പ്പുപല്ലും മറ്റ് അനുബന്ധ വസ്തുക്കളും ശരിയായി വൃത്തിയാക്കുക.

ഭക്ഷണവും ഭക്ഷണം കഴിക്കുന്ന രീതികളും കൂടുതൽ ശ്രദ്ധിക്കുക. ഉദാഹരണത്തിന്​ കട്ടിയുള്ളതും പല്ലിനിടയിൽ കുടുങ്ങുന്നതുമായ ഭക്ഷ്യവസ്തുക്കൾ.

ദന്താരോഗ്യത്തിന് പ്രാധാന്യം നൽകുക. മോണരോഗവും പ്ളേക്കുകൾ പല്ലിനടിയിൽ അടിയുന്നതും പരിഹരിക്കുക.

പല്ലിന് ഇളക്കവും രക്തസ്രാവവും വായ് നാറ്റവുമുണ്ടെങ്കിൽ മോണ രോഗത്തിന്റെ ചികിത്സ കൂടി ഉൾപ്പെടുത്തുക. പല്ലിൽ കറ പിടിക്കുന്ന വസ്തുക്കൾ, മരുന്ന്, പുകയില ഉൽപന്നങ്ങൾ എന്നിവ ഒഴിവാക്കുക. കറ മാറുന്നതിനായി ചെയ്യുന്ന സ്വയംചികിത്സകൾ മോണ രോഗത്തിന് കാരണമായേക്കാം.

പല്ല് ക്ലീൻ ചെയ്യുന്നതിനും വെളുപ്പിക്കുന്നതിനുമായി ഡോക്ടറെ ഇടയ്ക്കിടെ നിർബന്ധിക്കേണ്ടതില്ല. പല്ലുകളുടെ ആരോഗ്യത്തിന് ആവശ്യമെന്ന് തോന്നുന്നുണ്ടെങ്കിൽ ഡോക്ടർ തന്നെ അത് നിർദ്ദേശിക്കുന്നതാണ്.

ചുരുക്കത്തിൽ

വായ് നാറ്റം മാനസിക സമ്മർദ്ദമുണ്ടാക്കുകയും ആത്മവിശ്വാസത്തെതകർത്ത് അപകർഷതാബോധം കൂട്ടുകയും ചെയ്യും. എന്നാൽ,​ വളരെ വേഗത്തിൽ ചികിത്സിച്ചു ഭേദമാക്കാവുന്ന അവസ്ഥയാണ് വായ് നാറ്റം. ഇതിന് കാരണമായ രോഗങ്ങളെക്കൂടി പരിഗണിച്ച് ചെയ്യുന്ന ആയുർവേദ ചികിത്സകൾ ഫലപ്രദമാണ്.