തിരുവനന്തപുരം: വോട്ടർ പട്ടികയിൽ ഇരട്ട വോട്ടുകൾ വ്യാപകമായ സാഹചര്യത്തിൽ കള്ള വോട്ട് തടയാൻ ശക്തമായ നടപടികൾക്ക് തിരഞ്ഞെടുപ്പ് കമ്മിഷൻ. ഇരട്ട വോട്ടുകളുടെ ലിസ്റ്റ് വരണാധികാരികൾക്കും രാഷ്ട്രീയപാർട്ടികൾക്കും നൽകും. കൂടുതൽ പിശകുള്ള ബൂത്തുകളിൽ പൊലീസ് സുരക്ഷ ശക്തമാക്കുന്നതിനൊപ്പം, വെബ് കാസ്റ്റിംഗും ഏർപ്പെടുത്തും. കള്ളവോട്ട് ചെയ്യുന്നവർക്കും കൂട്ടുനിൽക്കുന്നവർക്കും തടയുന്നതിൽ അനാസ്ഥ കാട്ടുന്ന ഉദ്യോഗസ്ഥർക്കുമെതിരെ നിയമനടപടി സ്വീകരിക്കും.

പരാതികളിൽ പറയുന്ന പ്രകാരം വോട്ടർപ്പട്ടികയിൽ പിശകുകളുണ്ടെന്ന് തിരഞ്ഞെടുപ്പ് കമ്മിഷൻ സമ്മതിച്ചു. ഒരേ ഫോട്ടോയും വിലാസവും വ്യത്യസ്തമായ പേരുകളുമുള്ള എൻട്രികളുണ്ട്. ഇത്തരം പിശകുകൾ എറോനെറ്റ്, ഡീ ഡ്യൂപ്ലിക്കേഷൻ സോഫ്റ്റ്‌വെയർ എന്നിവ ഉപയോഗിച്ച് കണ്ടെത്തി പരിഹരിക്കണം. എന്നാൽ, തിരഞ്ഞെടുപ്പ് പ്രഖ്യാപിച്ച സാഹചര്യത്തിൽ പട്ടിക തിരുത്താനാവില്ല.

 കള്ള വോട്ട് തടയാൻ നടപടികൾ ഇങ്ങനെ

• 140 മണ്ഡലങ്ങളിലും ഇലക്ടറൽ രജിസ്‌ട്രേഷൻ ഓഫീസർമാരുടെ നേതൃത്വത്തിൽ പ്രത്യേക പരിശോധന നടത്തി ജില്ലാകളക്ടർമാർ 25ന് മുമ്പ് ആവർത്തന വോട്ടുകളുടെ ബൂത്ത്തല പട്ടികയുണ്ടാക്കും
• ഈ പട്ടിക ബി.എൽ.ഒമാർ ഫീൽഡ്തലത്തിൽ പോയി പരിശോധിച്ച് യഥാർത്ഥ വോട്ടർമാരെ കണ്ടെത്തും.
• യഥാർത്ഥ വോട്ടർക്ക് വോട്ടർ സ്ലിപ്പ് വിതരണം ചെയ്യുകയും ഒരു വോട്ടേ ചെയ്യാവൂ എന്ന് ബോദ്ധ്യപ്പെടുത്തുകയും ചെയ്യും.
• ഇതനുസരിച്ച് ആവർത്തനമുള്ള വോട്ടർമാരുടെ യഥാർത്ഥ വോട്ടും വ്യാജവോട്ടും വേർതിരിച്ച് പട്ടിക തയ്യാറാക്കി 30ന് മുമ്പ് വരണാധികാരികൾക്ക് നൽകും.
• വോട്ടെടുപ്പ് ദിവസം പ്രിസൈഡിംഗ് ഓഫീസർമാർ ആവർത്തനമുള്ള വോട്ടർമാരുടെ പട്ടിക പ്രത്യേകം അടയാളപ്പെടുത്തും.
• ഈ പട്ടികയിലുള്ള വോട്ടർമാരെ വിരലിലെ മഷി ഉണങ്ങുന്നത് വരെ ബൂത്തിലിരുത്തും.
• വോട്ടർപട്ടികയിൽ കൂടുതൽ അപാകതകളുള്ള ബൂത്തുകളിൽ വെബ്കാസ്റ്റിംഗ്/സി.സി.ടി.വി നിർബന്ധമാക്കും