തിരുവനന്തപുരം:എസ്.ഐ.യു.സി ഒഴികെയുളള ക്രിസ്തുമത വിഭാഗത്തിലെ നാടാർ സമുദായത്തിന് പി.എസ്.സി യിൽ സംവരണാനുകൂല്യം പ്രാബല്യത്തിലാക്കാൻ ഇന്നലെ ചേർന്ന പി.എസ് .സി യോഗം തീരുമാനിച്ചു. ഫെബ്രുവരി 6 ന് ശേഷം പ്രസിദ്ധപ്പെടുത്തുന്ന വിജ്ഞാപന പ്രകാരമാണ് സംവരണം ബാധകം. ഫെബ്രുവരി 6 ന് മുമ്പ് പ്രസിദ്ധപ്പെടുത്തിയതോ അപേക്ഷ സമർപ്പിക്കുന്നതിനുള്ള അവസാന തീയതി കഴിഞ്ഞതോ ആയ വിജ്ഞാപനങ്ങൾക്ക് സംവരണാനുകൂല്യം ലഭിക്കില്ല.ഫെബ്രുവരി 6 ലെ പിന്നാക്ക വിഭാഗ വികസന വകുപ്പിന്റെ ഉത്തരവ് പ്രകാരമാണ് എസ്.ഐ.യു.സി. ഒഴികെയുളള ക്രിസ്തുമത വിഭാഗത്തിലുള്ള നാടാർ സമുദായത്തെ സംസ്ഥാന ഒ.ബി.സി. പട്ടികയിൽ ഉൾപ്പെടുത്തി സംവരണാനുകൂല്യം അനുവദിക്കാൻ സർക്കാർ തീരുമാനിച്ചത്. ഹിന്ദു നാടാർ, എസ്.ഐ.യു.സി. നാടാർ വിഭാഗങ്ങൾക്ക് മാത്രമായിരുന്നു സംവരണം ഉണ്ടായിരുന്നത്.

അഭിമുഖം നടത്തും

ഹയർ സെക്കൻഡറി വിദ്യാഭ്യാസ വകുപ്പിൽ ഹയർ സെക്കൻഡറി സ്‌കൂൾ ടീച്ചർ (സോഷ്യൽ വർക്) (എൻ.സി.എ.-ഈഴവ) (കാറ്റഗറി നമ്പർ 433/19), കോളേജ് വിദ്യാഭ്യാസ വകുപ്പിൽ (ട്രെയിനിംഗ് കോളേജുകൾ) അസിസ്റ്റന്റ് പ്രൊഫസർ (സംസ്‌കൃതം) (തസ്തികമാറ്റം മുഖേന) (കാറ്റഗറി നമ്പർ 18/2020), കോളേജ് വിദ്യാഭ്യാസ വകുപ്പിൽ അസിസ്റ്റന്റ് പ്രൊഫസർ (മാത്തമാറ്റിക്സ്) (ഏഴാം എൻ.സി.എ- പട്ടികവർഗം) (കാറ്റഗറി നമ്പർ 310/20), തൃശൂർ, വയനാട്, കാസർകോട് ജില്ലകളിൽ വിദ്യാഭ്യാസ വകുപ്പിൽ പാർട്ട്ടൈം ജൂനിയർ ലാംഗ്വേജ് ടീച്ചർ (സംസ്‌കൃതം) (ഒന്നാം എൻ.സി.എ.-എൽ.സി./എ.ഐ, മുസ്ലിം) (കാറ്റഗറി നമ്പർ 619/19, 621/19), തൃശൂർ ജില്ലയിൽ വിദ്യാഭ്യാസ വകുപ്പിൽ പാർട്ട് ടൈം ജൂനിയർ ലാംഗ്വേജ് ടീച്ചർ (അറബിക്) യു.പി.എസ്. (അഞ്ചാം എൻ.സി.എ.-പട്ടികജാതി) (കാറ്റഗറി നമ്പർ 629/19), തൃശൂർ ജില്ലയിൽ വിദ്യാഭ്യാസ വകുപ്പിൽ പാർട്ട് ടൈം ജൂനിയർ ലാംഗ്വേജ് ടീച്ചർ (അറബിക്) എൽ.പി.എസ്. (നാലാം എൻ.സി.എ.- ഒ.ബി.സി.) (കാറ്റഗറി നമ്പർ 630/19), ആലപ്പുഴ, വയനാട് ഒഴികെയുള്ള ജില്ലകളിൽ ആരോഗ്യ വകുപ്പിൽ ജൂനിയർ പബ്ലിക് ഹെൽത്ത് നഴ്സ് ഗ്രേഡ് 2 (പട്ടികജാതി/പട്ടികവർഗം, പട്ടികവർഗം) (കാറ്റഗറി നമ്പർ 553/19), എൻ.സി.സി./സൈനികക്ഷേമ വകുപ്പിൽ ലാസ്റ്റ് ഗ്രേഡ് സെർവന്റ്സ് (പട്ടികവർഗ വിഭാഗത്തിൽപെടുന്ന വിമുക്തഭടൻമാരിൽ നിന്നു മാത്രം) (കാറ്റഗറി നമ്പർ 261/20), ഹയർ സെക്കൻഡറി വിദ്യാഭ്യാസ വകുപ്പിൽ എച്ച്.എസ്.എസ്.ടി. കെമിസ്ട്രി (പട്ടികവർഗം) (കാറ്റഗറി നമ്പർ 285/20) തസ്തികകളിൽ അഭിമുഖം നടത്താൻ പി.എസ്.സി യോഗം തീരുമാനിച്ചു.

തുറമുഖ വകുപ്പിൽ (ഹൈഡ്രോഗ്രാഫിക് സർവേ ബ്രാഞ്ച്) ഡ്രാഫ്ട്സ്മാൻ ഗ്രേഡ് 2 (കാറ്റഗറി നമ്പർ 314/19) തസ്തികയിലേക്ക് സാദ്ധ്യതാ പട്ടിക പ്രസിദ്ധീകരിക്കാനും ഹയർ സെക്കൻഡറി വിദ്യാഭ്യാസ വകുപ്പിൽ ഹയർ സെക്കൻഡറി സ്‌കൂൾ ടീച്ചർ (ഇസ്ലാമിക് ഹിസ്റ്ററി) (കാറ്റഗറി നമ്പർ 485/19) തസ്തികയിലേക്ക് ഓൺലൈൻ പരീക്ഷ നടത്താനും സാങ്കേതിക വിദ്യാഭ്യാസ വകുപ്പിൽ (പോളിടെക്നിക് കോളേജുകൾ) ലക്ചറർ ഇൻ കൊമേഴ്സ് (പട്ടികവർഗം)(കാറ്റഗറി നമ്പർ 111/20) ചുരുക്കപ്പട്ടിക പ്രസിദ്ധീകരിക്കാനും യോഗം തീരുമാനിച്ചു.