മാവേലിക്കര : ആത്മബോധോദയസംഘ സ്ഥാപകൻ ശുഭാനന്ദ ഗുരുവിന്റെ 139ാമത് പൂരം ജന്മനക്ഷത്ര മഹാമഹത്തിന് ഇന്ന് കൊടിയേറും. ആത്മബോധോദയസംഘത്തിന്റെ കേന്ദ്രസ്ഥാപനമായ മാവേലിക്കര ചെറുകോൽ ശ്രീശുഭാനന്ദാശ്രമത്തിൽ ആശ്രമാധിപതി ദേവാനന്ദ ഗുരു രാവിലെ 10ന് കൊടിയേ​റ്റ് നിർവ്വഹിക്കും. തുടർന്ന് നടക്കുന്ന സമൂഹാരാധനയിൽ ദേവാനന്ദ ഗുരു അനുഗ്രഹപ്രഭാഷണം നടത്തും. പത്തു ദിവസങ്ങളിലായി നടത്തുന്ന ആഘോഷപരിപാടികളിൽ എല്ലാ ദിവസവും ഗുരുപൂജ, പ്രാർത്ഥന, ഗുരുദക്ഷിണ, സമാധി മണ്ഡപത്തിൽ പുഷ്പാർച്ചന, ആശ്രമപ്രദക്ഷിണം, സ്തുതി, ആത്മീയ പ്രഭാഷണങ്ങൾ, അന്നദാനം, ശ്രീശുഭാനന്ദ ഭക്തിഗാനസുധ എന്നിവ നടക്കും.

ഇന്ന് ഉച്ചയ്ക്ക് 2ന് യുവജന സമ്മേളനം റവ.ഫാദർ അജി തോമസ് സമ്മേളനം ഉദ്ഘാടനം ചെയ്യും. സ്വാമി വേദാനന്ദൻ അദ്ധ്യക്ഷനാവും. മാവേലിക്കര നഗരസഭ വികസന സ്​റ്റാൻഡിംഗ് കമ്മ​റ്റി ചെയർമാൻ അനിവർഗ്ഗീസ് മുഖ്യപ്രഭാഷണം നടത്തും. 21ന് ഉച്ചയ്ക്ക് 2ന് നടക്കുന്ന വനിതാ സമ്മേളനം പത്തനംതിട്ട ചീഫ് ജുഡീഷ്യൽ മജിസ്‌ട്രേ​റ്റ് കവിത ഗംഗാധരൻ ഉദ്ഘാടനം ചെയ്യും. സന്യാസിനി ഗുരുകർമ്മാനന്ദിനിയമ്മ അദ്ധ്യക്ഷയാവും. മാവേലിക്കര ബ്ലോക്ക് പഞ്ചായത്ത് പ്രസിഡന്റ് ഇന്ദിരദാസ് മുഖ്യപ്രഭാഷണം നടത്തും. 22ന് ഉച്ചയ്ക്ക് 2ന് നടക്കുന്ന സാംസ്‌കാരിക സമ്മേളനം ഡോ.ജോഷ്വാ മാർ ഇഗ്നാത്തിയോസ് മെത്രാപ്പോലിത്ത ഉദ്ഘാടനം ചെയ്യും. സ്വാമി ശുഭാനന്ദദാസ് അദ്ധ്യക്ഷനാവും. ഡോ.വേണു മുഖ്യപ്രഭാഷണം നടത്തും. സമാപനദിവസമായ 23ന് രാവിലെ 10ന് ജന്മനക്ഷത്ര ഘോഷയാത്ര നടക്കും. ഉച്ചയ്ക്ക് 2.15ന് നടക്കുന്ന ജന്മനക്ഷത്ര സമ്മേളനം പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും. ട്രസ്​റ്റ് സെക്രട്ടറി സ്വാമി ഗീതാനന്ദൻ അദ്ധ്യക്ഷനാവും. ഡോ.മാത്യൂസ് മാർ തിമോത്തിയോസ് മെത്രാപ്പോലിത്ത ആശീർവാദവും ദേവാനന്ദ ഗുരു അനുഗ്രഹപ്രഭാഷണവും നടത്തും. കൊടിക്കുന്നിൽ സുരേഷ് എം.പി മുഖ്യപ്രഭാഷണം നടത്തും. വൈകിട്ട് സേവയും സംഗീത സദസ്സും നടക്കും. 24ന് രാവിലെ കൊടിയിറക്ക് .