ആലപ്പുഴ: 'ലോകമേ തറവാട് ' ബിനാലെ പ്രദർശനം ആലപ്പുഴയുടെ വികസനത്തിന് വഴികാട്ടിയാകുമെന്ന് കലാകാരനും ക്യുറേറ്ററും ബിനാലെ സംഘാടകനുമായ ബോസ് കൃഷ്ണമാചാരി പറഞ്ഞു. ചരിത്രപരമായി ഏറെ പ്രത്യേകതകയുള്ള നഗരമാണ് ആലപ്പുഴ. ലോകത്ത് നടക്കുന്ന എല്ലാ ബിനാലെകളും ചരിത്രവും സംസ്‌കാരവുമെല്ലാം ഇടകലർന്നുള്ളതാണ്. ആലപ്പുഴ ഒരു പൈതൃക നഗരമായതു കൊണ്ടാണ് ബിനാലെ ഇവിടെ നടത്താൻ കാരണമെന്നും ബോസ് കൃഷ്ണമാചാരി പറഞ്ഞു. ദീർഘ കാലം നീണ്ടു നിൽക്കുന്ന ഇത്തരമൊരു പ്രദർശനം ഇന്ത്യയിൽ മറ്റെവിടെയും നടന്നിട്ടുണ്ടാകില്ല. മൂല്യമുള്ള സൃഷ്ടികൾ കോർത്തിണക്കിയ പ്രദർശനം മലയാളികൾക്ക് ഒരു വേദിയിൽ കാണാനുള്ള അവസരമാണ് ലഭിക്കുന്നത്. കൊച്ചി ബിനാലെയുമായി വ്യത്യസ്തമായി ലോകമേ തറവാട് ഒരു വാണിജ്യപരമായ പ്രദർശനമല്ലെങ്കിലും പൊതുജനങ്ങൾക്ക് കലാകാരന്മാരുടെ സൃഷ്ടികൾ വാങ്ങാൻ സാധിക്കുമെന്നും ബോസ് കൃഷ്ണമാചാരി പറഞ്ഞു.