ആലപ്പുഴ: മന്ത്രി ജി.സുധാകരനെതിരെ അപകീർത്തികരമായ പോസ്റ്റർ പതിച്ചതുമായി ബന്ധപ്പെട്ട് പുന്നപ്ര തെക്ക് പഞ്ചായത്ത് മുൻ അംഗവും കോൺഗ്രസ് പ്രാദേശിക നേതാവുമായ തോബിയാസിനെതിരെ സി.പി.എം പുന്നപ്ര ലോക്കൽ സെക്രട്ടറി ഡി.അശോക് കുമാർ പുന്നപ്ര പൊലീസിൽ പരാതി നൽകി.

ഇന്നലെ രാവിലെ 8 മണിയോടെയാണ് കപ്പക്കട ജംഗ്ഷന് പടിഞ്ഞാറ് റെയിൽവേ ക്രോസിനു സമീപം, മുഖ്യമന്ത്രിയുടെ പടമുള്ള വലിയ ഫ്ളക്സിന്റെ മൂലയിൽ അശ്രദ്ധമായ നിലയിൽ പതിച്ച പോസ്റ്റർ കണ്ടെത്തിയത്. ഈ സമയം ഇവിടെയെത്തിയ തോബിയാസ് ഇത് മൊബൈൽ കാമറയിൽ ചിത്രീകരിക്കുന്നത് കണ്ടതായി സമീപവാസികൾ പറഞ്ഞു. സംഭവത്തിൽ ഉൾപ്പെട്ട മുഴുവൻ പേരെയും നിയമത്തിനു മുമ്പിൽ കൊണ്ടുവന്ന് മാതൃകാപരമായി ശിക്ഷിക്കണമെന്ന് സി​.പി​.എം ഏരിയാ സെക്രട്ടറി എ.ഓമനക്കുട്ടൻ പ്രസ്താവനയിൽ ആവശ്യപ്പെട്ടു. പ്രകോപനമുണ്ടാക്കാൻ ക്രിമിനൽ സ്വഭാവമുള്ള ചിലർ ബോധപൂർവ്വവും നടത്തിയ ശ്രമമാണിത്. ഉന്നത രാഷ്ട്രീയ നേതാവിനെ അപകീർത്തിപ്പെടുത്താനുള്ള ബോധപൂർവ്വമായ ശ്രമം നടക്കുന്നുണ്ടെന്ന് പ്രസ്താവനയിൽ പറഞ്ഞു.