ആലപ്പുഴ: കൊവിഡ് പ്രതിരോധ പ്രവർത്തനങ്ങളുമായി ബന്ധപ്പെട്ട വിവരങ്ങൾ പൊതുജനങ്ങൾക്ക് നൽകുന്നതിനും വാക്‌സിൻ എടുക്കുന്നതിനുള്ള ഓൺലൈൻ രജിസ്‌ട്രേഷനിൽ സഹായിക്കുന്നതിനുമായി നെഹ്രു യുവ കേന്ദ്രയുടെ നേതൃത്വത്തിൽ യൂത്ത് ക്ലബ്ബുകൾ കേന്ദ്രീകരിച്ച് സംസ്ഥാനത്ത് 1500 ഹെൽപ് ഡെസ്‌കുകൾ ആരംഭിക്കും. കോവിഡ് പ്രതിരോധ പ്രവർത്തനങ്ങളിൽ യൂത്ത് ക്ലബ്ബുകളുടെ പങ്കാളിത്വം ഊർജ്ജിതമാക്കുന്നതിന്റെ ഭാഗമായി സംഘടിപ്പിച്ച വെബ്ബിനാറിലാണ് തീരുമാനം.

ജില്ലാ ഭരണകൂടം, ആരോഗ്യ വകുപ്പ്, തദ്ദേശ സ്വയംഭരണ സ്ഥാപനങ്ങൾ എന്നിവ നൽകുന്ന മാർഗ്ഗ നിർദ്ദേശമനുസരിച്ച് ജില്ലാ നെഹ്‌റു യുവ കേന്ദ്രകളുടെ മേൽനോട്ടത്തിലായിരിക്കും ഹെൽപ് ഡെസ്‌കുകളുടെ പ്രവർത്തനം. ഓരോ ജില്ലയിലും 100 യൂത്ത് ക്ലബുകളിലാണ് ആദ്യ ഘട്ടത്തിൽ ഡെസ്‌കുകൾ തുടങ്ങുന്നത്. ഓൺലൈൻ യോഗത്തിൽ സംസ്ഥാന ഡയറക്ടർ കെ.കുഞ്ഞഹമ്മദ്, ആരോഗ്യ വകുപ്പ് ഡയറക്ടർ ഡോ. ആർ.എൽ.സരിത, അഡിഷണൽ ഡയറക്ടർ തുടങ്ങിയവർ പങ്കെടുത്തു.