ഹരിപ്പാട്: തൃക്കുന്നപ്പുഴ പഞ്ചായത്ത് കേന്ദ്രീകരി​ച്ച് കൊവിഡ് പ്രതിരോധ പ്രവർത്തനങ്ങളുടെ ഏകോപനത്തിനായി കൺ​ട്രോൾ റൂം പ്രവർത്തനം ആരംഭി​ക്കുവാനും പഞ്ചായത്ത് പരിധിയിലെ എല്ലാ പീലിംഗ് ഷെഡുകളും മെയ് രണ്ടു വരെ പ്രവർത്തനം നി​ർത്തി​വയ്ക്കുവാനും സർവകക്ഷി​യോഗത്തി​ൽ തീരുമാനി​ച്ചു. ഇതുമായി ബന്ധപ്പെട്ട പരിശോധനകൾ നടത്തുവാൻ പൊലീസ്, ആരോഗ്യവകുപ്പ് ഉദ്യോഗസ്ഥരെ യോഗം ചുമതലപ്പെടുത്തി. അടിയന്തര സാഹചര്യങ്ങളിൽ ആംബുലൻസിന്റെ സേവനം ഉറപ്പ് വരുത്തും. വാർഡ് തല ജാഗ്രതാ സമിതികളുടെ പ്രവർത്തനം കൂടുതൽ ശക്തമാക്കുന്നതിന് ആവശ്യമായ അടിയന്തര ഇടപെടൽ നടത്താൻ തീരുമാനിച്ചു. വാർഡ് അടിസ്‌ഥാനത്തിൽ ജനപ്രതിനിധികൾ , കുടുംബശ്രീ പ്രവർത്തകർ, അംഗൻവാടി ജീവനക്കാർ, ആശാ പ്രവർത്തകർ,സന്നദ്ധ പ്രവർത്തകർ എന്നിവരുടെ പങ്കാളിത്തത്തോടെ വാക്സിനേഷൻ രജിസ്‌ട്രേഷനടക്കമുള്ള പ്രവർത്തനങ്ങൾ കൂടുതൽ കാര്യക്ഷമമായി നടത്തും. ആയുർവേദ-ഹോമിയോ പ്രതിരോധ മരുന്നുകൾ ലഭ്യമാക്കാൻ തീരുമാനിച്ചു.

പഞ്ചായത്ത് പ്രസിഡന്റ് എസ്. വിനോദ്കുമാർ അദ്ധ്യക്ഷനായി. യോഗത്തിൽ ജില്ലാപഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ അഡ്വ.റ്റി.എസ് താഹ, ബ്ലോക്ക്- ഗ്രാമപ്പഞ്ചായത്ത് അംഗങ്ങൾ, വിവിധ രാഷ്ട്രീയ പാർട്ടി പ്രതിനിധികൾ ,വിവിധ വകുപ്പുകളിലെ ഉദ്യോഗസ്ഥർ തുടങ്ങിയവർ പങ്കെടുത്തു.