തൃക്കാക്കര: മുട്ടാർ പുഴയിൽ മരിച്ച നിലയിൽ കണ്ടെത്തിയ പതിനൊന്നുകാരി വൈഗ 'ബില്ലി' എന്ന ഇനിയും പുറത്തിറങ്ങാത്ത സിനിമയിൽ മുഴുനീള കഥാപാത്രത്തെ അവതരിപ്പിച്ചിട്ടുണ്ട്. അഞ്ചു സിനിമകൾ ചേർന്ന 'ചിത്രഹാറി'ലെ ഒരു സിനിമയാണ് കുട്ടികൾക്കുവേണ്ടിയുള്ള ബില്ലി. സിനിമ നിർമ്മിച്ചത് വൈഗ താമസിക്കുന്ന ഫ്ളാറ്റ് സമുച്ചയത്തിലെ ഒരു സ്ത്രീയാണ്. ഒരു വർഷം മുമ്പ് ചിത്രീകരണം പൂർത്തിയാക്കി.

അതേസമയം, വൈഗ കേസിൽ ഒളിവിൽ പോയ പിതാവ് സാനുമോഹനെ തേടി കൂടുതൽ പൊലീസുകാർ ഉടൻ ചെന്നൈയിലേക്ക് തിരിക്കും. കാക്കനാട് കങ്ങരപ്പടി ഹാർമണി ഫ്ളാറ്റിൽ ശ്രീഗോകുലത്തിൽ സാനുവിന്റെയും ഭാര്യയുടെയും ഫോൺ രേഖകൾ പരിശോധിച്ചതിൽ നിന്ന് കോയമ്പത്തൂരിലും ചെന്നൈയിലുമുള്ള ചില സുഹൃത്തുക്കളെ വിളിച്ചതായി കണ്ടെത്തിയിരുന്നു. കോയമ്പത്തൂരിൽ ജോലിചെയ്തിരുന്ന തിരുവനന്തപുരം സ്വദേശി എസ്. ഉണ്ണിക്കൃഷ്ണനെ കഴിഞ്ഞദിവസം പൊലീസ് കൊച്ചിയിൽ വിളിച്ചുവരുത്തി ചോദ്യം ചെയ്തു.
സാനുവിന്റെ ചെന്നൈയിലെ ചില സുഹൃത്തുക്കളിൽ നിന്ന് നിർണായക വിവരങ്ങൾ ലഭിച്ചതായാണ് സൂചന. 2016ൽ ഭാര്യ രമ്യയുടെ പേരിൽ വാങ്ങിയ ഫ്ളാറ്റ് സാനുമോഹൻ പണയം വച്ചതിനെക്കുറിച്ച് പ്രമുഖ ബാങ്കുകളിൽ അന്വേഷണം നടത്തിയെങ്കിലും വിവരമൊന്നും കിട്ടിയില്ല. 12 സ്വകാര്യ ബാങ്കുകൾക്ക് പൊലീസ് നോട്ടീസ് കൊടുത്തെങ്കിലും മറുപടി ലഭിച്ചിട്ടില്ല.