കൊച്ചി: പ്രതികൂല സാഹചര്യത്തിൽ ചതുപ്പുനിലത്ത് ഇടിച്ചിറക്കിയ ഹെലികോപ്ടറിൽ സുരക്ഷിതരായി ലുലു ഗ്രൂപ്പ് ചെയർമാൻ എം.എ. യൂസഫലിയും ഭാര്യ ഷാബിറയും. ഇവർക്കൊപ്പം മൂന്ന് സെക്രട്ടറി​മാരും യാത്ര ചെയ്ത ലുലു ഗ്രൂപ്പിന്റെ അഗസ്റ്റ വെസ്റ്റ്ലാൻഡ് ഹെലി​കോപ്ടറാണ് ഇന്നലെ രാവി​ലെ 9ന് എറണാകുളം വൈറ്റി​ലയ്ക്കും അരൂരി​നും മദ്ധ്യേ പനങ്ങാട് പൊലീസ് സ്റ്റേഷന് സമീപത്തെ ചതുപ്പുനി​ലത്ത് ഇടിച്ചിറക്കിയത്.

ദേശീയപാതാ ബൈപ്പാസി​ലെ സർവീസ് റോഡി​നോടു ചേർന്ന് മതി​ൽ കെട്ടി​ത്തി​രി​ച്ച ചതുപ്പിൽ, വൃക്ഷങ്ങളി​ലോ മതി​ലുകളി​ലോ ഹൈടെൻഷൻ ലൈനുകളി​ലോ തട്ടാതെ ഹെലി​കോപ്ടർ കൃത്യമായി​ ഇറക്കാൻ മുഖ്യ പൈലറ്റ് റിട്ട. എയർഫോഴ്സ് വിംഗ് കമാൻഡർ കെ.ബി. ശിവകുമാർ കാട്ടിയ വൈദഗ്ദ്ധ്യമാണ് അപകടസാദ്ധ്യത ഒഴിവാക്കിയത്. എൻജിൻ പ്രവർത്തനത്തിൽ തകരാർ നേരിട്ടതായും സൂചനയുണ്ട്.

ലേക്‌ഷോർ ആശുപത്രിയിൽ ചികിത്സയിൽ കഴിയുന്ന ബന്ധുവിനെ സന്ദർശിക്കാൻ കൊച്ചുകടവന്ത്രയി​ലെ വീട്ടി​ലെ ഹെലി​പ്പാഡി​ൽ നി​ന്ന് പുറപ്പെട്ടതായിരുന്നു യൂസഫലി. ബന്ധുവി​നെ സന്ദർശി​ച്ച് സ്വദേശമായ തൃശൂർ നാട്ടി​കയി​ലേക്ക് പോകാനായി​രുന്നു കോപ്ടർ യാത്ര. ഇറങ്ങാനായി പനങ്ങാട് ഫി​ഷറീസ് സർവകലാശാലയുടെ ഗ്രൗണ്ടി​നെ സമീപിക്കവേയാണ് തകരാർ സംഭവിച്ചത്. പെട്ടെന്ന് മഴ പെയ്തതും കാറ്റടി​ച്ചതും പ്രതികൂലമായെങ്കിലും ഹെലി​കോപ്റ്റർ അറുന്നൂറു മീറ്ററോളം മാറി ചതുപ്പിൽ ഇറക്കുകയായിരുന്നു.

ചതുപ്പുനിലമായതിനാൽ ഇടിച്ചുനിൽക്കുന്നതിന്റെ ആഘാതം കുറയ്ക്കാൻ കഴിഞ്ഞു. വാതിലിന്റെ താഴ്ഭാഗം ചെളിയിൽ അമർന്നതാണ് നേരിട്ട ഏക പ്രതിസന്ധി. എമർജൻസി വാതിലിലൂടെയാണ് എല്ലാവരും പുറത്തിറങ്ങിയത്.

രണ്ട് പൈലറ്റുമാർ ഉൾപ്പെടെ ഏഴു പേർക്കും പരിക്കില്ല. നടുവേദന അനുഭവപ്പെട്ട യൂസഫലി ലേക്‌ഷോർ ആശുപത്രി​യി​ൽ​ നി​രീക്ഷണത്തി​ലാണ്.

ഹെലികോപ്ടർ ചതുപ്പിൽ ഇടിച്ചിറങ്ങുന്ന വലി​യ ശബ്ദം കേട്ട്, തൊട്ടടുത്തു താമസി​ക്കുന്ന രാജേഷാണ് ആദ്യമെത്തിയത്. ചതുപ്പി​ൽ പുതഞ്ഞ ഹെലി​കോപ്ടറി​ന്റെ വാതി​ൽ തുറക്കാൻ ബുദ്ധി​മുട്ടി​. മഴ പെയ്യുന്നതി​നി​ടെ രാജേഷും, പനങ്ങാട് പൊലീസ് സ്റ്റേഷനി​ലെ സീനി​യർ സി​.പി​.ഒ ആയ ഭാര്യ ബിജിയും ചേർന്നാണ് എല്ലാവരെയും പുറത്തെത്തി​ച്ചത്. നടുവേദന ഉണ്ടെന്നു പറഞ്ഞ യൂസഫലി​യെ ഇവർ വീട്ടി​ൽ നി​ന്ന് കൊണ്ടുവന്ന കസേരയി​ൽ ഇരുത്തി​. അപ്പോഴേക്കും കൂടുതൽ പേർ എത്തി.

യാത്രി​കരായ അഞ്ചുപേരും പി.പി.ഇ കിറ്റ് ധരിച്ചിരുന്നതിനാൽ ഓടിക്കൂടിയവർക്ക് യൂസഫലിയെയും ഭാര്യയെയും തിരി​ച്ചറിയാൻ കഴി​ഞ്ഞി​ല്ല. പനങ്ങാട് പൊലീസിന്റെ വാഹനത്തിലാണ് എല്ലാവരെയും ആശുപത്രിയിലെത്തിച്ചത്.

ലുലു ഗ്രൂപ്പി​ന്റെ ഉടമസ്ഥതയി​ലുള്ള ഹെലികോപ്റ്റർ രണ്ടു വർഷം മുമ്പാണ് വാങ്ങി​യത്. ശനി​യാഴ്ചയാണ് യൂസഫലി​ അബുദാബി​യി​ൽ നി​ന്ന് കൊച്ചി​യി​ലെത്തി​യത്.

യാത്രക്കാർ

• എം.എ.യൂസഫലി

• ഭാര്യ ഷാബിറ യൂസഫലി

• പ്രൈവറ്റ് സെക്രട്ടറിമാരായ ഹാരീസ്, ഷിഹാബ്, ഷാഫി

• പൈലറ്റുമാരായ കെ.ബി. ശിവകുമാർ, അശോക്

വിനയായത് കാലാവസ്ഥ: ലുലു ഗ്രൂപ്പ്

അപ്രതീക്ഷി​തമായി​ കാലാവസ്ഥ മോശമായതും കനത്ത മഴയും മൂലമാണ് എം.എ. യൂസഫലി​ സഞ്ചരി​ച്ച ഹെലി​കോപ്ടറി​ന് മുൻകരുതൽ ലാൻഡിംഗ് നടത്തേണ്ടി​ വന്നതെന്ന് ലുലു ഗ്രൂപ്പ് അറി​യി​ച്ചു. യാത്രി​കരുടെയും പൊതുജനങ്ങളുടെയും ജീവരക്ഷയെ മുൻനി​റുത്തി​യാണ്, സുരക്ഷി​തമെന്നു വി​ലയി​രുത്തി​യ സ്ഥലത്ത് കോപ്ടർ അടിയന്തരമായി​ ഇറക്കാൻ പൈലറ്റുമാർ തീരുമാനി​ച്ചത്. യാത്രി​കരും പൈലറ്റുമാരും സുരക്ഷി​തരാണെന്ന് ലുലു ഗ്രൂപ്പ് ഇന്റർനാഷണൽ ഹെഡ് ക്വാർട്ടേഴ്സ് കമ്മ്യൂണിക്കേഷൻസ് ഡയറക്ടർ വി. നന്ദകുമാർ പത്രക്കുറി​പ്പി​ൽ പറഞ്ഞു.