കൊച്ചി: ദേശീയ അഗ്‌നിരക്ഷാ വാരാഘോഷത്തിന്റെ ഭാഗമായി സംസ്ഥാന അഗ്‌നിരക്ഷാ വകുപ്പിന്റെയും കേരള സിവിൽ ഡിഫൻസിന്റെയും ആഭിമുഖ്യത്തിൽ കോഴിക്കോടു നിന്നും ആരംഭിച്ച സൈക്ലത്തോൺ 17ന് കൊച്ചിയിൽ സമാപിക്കും.

കോഴിക്കോട് മീൻചന്ത ഫയർ സ്റ്റേഷനിൽ നടന്ന ചടങ്ങിൽ റീജണൽ ഫയർ ഓഫീസർ ടി. രജീഷ് സൈക്ലത്തണിന്റെ ഫ്ലാഗ് ഓഫ് നിർവഹിച്ചു. ചടങ്ങിൽ കോഴിക്കോട് ഡി.എഫ്.ഒ മൂസ വടക്കേതിൽ, സ്റ്റേഷൻ ഓഫീസർ ടി.വി. വിശ്വാസ്, കോഴിക്കോട് സിവിൽ ഡിഫൻസ് ചീഫ് വാർഡൻ സിനീഷ്, എറണാകുളം ഡിവിഷനൽ വാർഡൻ ബിനു മിത്രൻ തുടങ്ങിയവർ പങ്കെടുത്തു.

കൊച്ചി ഐ.എ.ഡബ്ല്യു.സി.ആർ ഡയറക്ടറും റീജണൽ ഫയർ ഓഫീസറുമായ എം.ജി. രാജേഷാണ് കോഴിക്കോട് നിന്നുള്ള സൈക്ലത്തൺ ടീമിന്റെ റൈഡ് കമാൻഡർ . മട്ടാഞ്ചേരി സ്റ്റേഷൻ ഓഫീസർ പ്രേംനാഥ് റൈഡ് ലീഡറാണ്. ഇവരോടൊപ്പം അഗ്‌നിരക്ഷാവകുപ്പിലെയും സിവിൽ ഡിഫൻസിലെയും സൈക്കിളിസ്റ്റുകൾ പങ്കെടുക്കുന്നുണ്ട്. സൈക്ലത്തണുകൾ വിവിധ ജില്ലകളിലൂടെ സഞ്ചരിച്ച് 17ന് രാവിലെ കൊച്ചിയിൽ സംഗമിക്കും. ദേശീയ ഫയർസർവീസ് ഡേയുടെ ഭാഗമായി അഗ്‌നിസുരക്ഷയും മുൻകരുതലുകളുമായി ബന്ധപ്പെട്ട ബോധവത്കരണത്തിന്റെ ഭാഗമായാണ് ഇത്തരത്തിലൊരു പരിപാടി സംഘടിപ്പിച്ചിരിക്കുന്നത്. കൊവിഡ് മാനദണ്ഡങ്ങൾ പാലിച്ച് വനിതകൾ ഉൾപ്പെടെയുള്ള സിവിൽ ഡിഫൻസ് വോളന്റിയർമാരും സൈക്ലളണിൽ പങ്കെടുക്കുന്നുണ്ട്.