കോലഞ്ചേരി: പുത്തൻകുരിശിൽ കെ.എസ്.ആർ.ടി.സി ബസ് സ്റ്റാൻഡിന് മുമ്പിലുള്ള ആൽമരം അപകടാവസ്ഥയിൽ. മരം ചരിഞ്ഞു നിൽക്കുന്നതിനാൽ കണ്ടെയ്‌നർ ലോറികൾ വന്നു തട്ടി പലപ്പോഴും ശിഖരങ്ങൾ ഒടിഞ്ഞു വീഴാറുണ്ട്. ശക്തമായ മഴയും കാ​റ്റും ഉള്ളപ്പോൾ യാത്രക്കാരുടെ ദേഹത്ത് ​ചെറിയ കൊമ്പുകൾ വീഴുന്നതും പതിവാണ്. മരം ഒടിഞ്ഞുവീണാൽ തൊട്ടടുത്തുള്ള കച്ചവട സ്ഥാപനങ്ങൾക്കും കുരിശുപള്ളിക്കും കേടുപാടുകളുണ്ടാകാൻ സാദ്ധ്യതയുണ്ട്. തൃപ്പൂണിത്തുറ ഭാഗത്തേക്ക് പോകുന്ന യാത്രക്കാർ ആൽമരത്തിന് എതിർവശത്താണ് നിൽക്കുന്നത്. ശിഖരങ്ങൾ മുറിച്ചു മാ​റ്റിയില്ലെങ്കിൽ വൻ അപകടം ഉണ്ടാകാൻ സാധ്യതയുണ്ടെന്നാണ് നാട്ടുകാരുടെ പരാതി.