കോതമംഗലം: ഭൂതത്താൻകെട്ട് ഡാം പ്രദേശത്തെ തുരുത്തുകളിൽ വനപാലകർ നടത്തിയ റെയ്ഡിൽ വ്യാജചാരായം നിർമ്മിക്കാൻ തയ്യാറാക്കി വച്ചിരുന്ന 600 ലിറ്റർ വാഷ് കണ്ടെത്തി നശിപ്പിച്ചു.

ഡാമിൽ നിന്ന് കുട്ടമ്പുഴ ഭാഗത്തേക്ക് പുഴ മാർഗം പോകുമ്പോൾ ക്യാച്ച്മെന്റ് ഏരിയയിൽ നിരവധി തുരുത്തുകളുണ്ട്. കഴിഞ്ഞ ദിവസം എക്സൈസ് പിടികൂടിയ വ്യാജചാരായം ഈ പ്രദേശത്തെ തുരുത്തിലാണ് നിർമ്മിച്ചതെന്ന് കണ്ടെത്തിയിരുന്നു

തുണ്ടത്തിൽ റെയ്ഞ്ച് ഓഫീസർ മുഹമ്മദ്‌ റാഫി, ഭൂതത്താൻകെട്ട് ഡെപ്യൂട്ടി റേഞ്ചർ ജയൻ ജെ എന്നിവരുടെ നേതൃത്വത്തിൽ സെക്ഷൻ ഫോറസ്റ്റ് ഓഫീസർമാരായ രഘു, ഡായി, ബീറ്റ് ഫോറസ്റ്റ് ഓഫീസർ അനിൽ കുമാർ, ബിപിൻ ലാൽ, എ.കെ. ഘോഷ് എന്നിവർ ബോട്ടിലെത്തി നടത്തിയ പരിശോധനയിലാണ് വീപ്പയിലും, ടാർപ്പോളിൻ ഷീറ്റിലുമായി സൂക്ഷിച്ച വാഷ് കണ്ടെത്തിയത്. രാവിലെ 7 മണി മുതൽ ഉച്ചയ്ക്ക് 1 മണി വരെ റെയ്ഡ് നീണ്ടു. പ്രതികളെക്കുറിച്ച് സൂചന ലഭിച്ചിട്ടുണ്ടെന്നും ഉടൻ പിടികൂടുമെന്നും വനപാലകർ പറഞ്ഞു