പറവൂർ: കവിയും ബാലസാഹിത്യകാരനും അദ്ധ്യാപകനും സാംസ്കാരികപ്രവർത്തകനുമായ കരിമ്പാടം മറ്റപ്പിള്ളി വീട്ടിൽ ആനന്ദൻ ചെറായി (75) നിര്യാതനായി. 1972 മുതൽ വിവിധ സർക്കാർ സ്കൂളിൽ അദ്ധ്യാപകനായി സേവനമനുഷ്ഠിച്ച ശേഷം 2001ൽ വിരമിച്ചു. ആകാശവാണി, ദൂരദർശൻ എന്നിവയിൽ ഒട്ടേറെ പരിപാടികൾ അവതരിപ്പിച്ചിട്ടുണ്ട്. കുറുമൊഴിപ്പൂക്കൾ, ഓമനത്തിങ്കൾ, കടും പാട്ടുകൾ, പൂങ്കാവനം, കുട്ടിക്കിനാവുകൾ, കാവടിയാട്ടം, ജന്തുകഥപ്പാട്ടുകൾ, പൂരക്കാഴ്ച, അത്തപ്പത്തോണം, ഏകലവ്യൻ, എന്നിലെ നീ, തേന്മൊഴിപ്പഴങ്ങൾ എന്നിവയാണ് പ്രധാന കൃതികൾ. അഖില കേരള പൗരസ്ത്യ ഭാഷാദ്ധ്യാപക സംഘടനയുടെ സംസ്ഥാന കവിതാ പുരസ്കാരം, കേരള ശാന്തിസേന കവിതാ പുരസ്ക്കാരം, അധ്യാപക സംസ്ഥാന കലാസാഹിത്യ സമിതിയുടെ ബാലസാഹിത്യ പുരസ്കാരം, സമഷ്ടി കവിതാ പുരസ്ക്കാരം, ഗ്രന്ഥപ്പുര കവിതാ പുരസ്കാരം, സുവർണ രേഖ കവിതാ പുരസ്ക്കാരം, സാഫല്യം പുരസ്ക്കാരം, കെ.എസ്.എസ്.പി.യു. സംസ്ഥാന പുരസ്ക്കാരം, ഫാ. ജേക്കബ് കല്ലറക്കൽ ഭക്തി ഗാനരചന സംസ്ഥാന അവാർഡ് എന്നിവ ലഭിച്ചിട്ടുണ്ട്. സാഹിത്യശ്രീ മാസികയുടെ മുൻ പത്രാധിപരാണ്. സാഹിത്യപ്രവർത്തക സ്വാശ്രയ സംഘം, ബാലസാഹിത്യ സമിതി എന്നിവയുടെ മുൻ പ്രസിഡന്റാണ്. പറവൂർ മൂകാബികാ ക്ഷേത്രത്തിൽ വിദ്യാരംഭം കുറിക്കുന്ന ഗുരുക്കളിലൊരാളായിരുന്നു. ജില്ലാ - സംസ്ഥാന സ്കൂൾ കലോത്സവങ്ങളിൽ ജഡ്ജായിരുന്നിട്ടുണ്ട്. സംസ്കാരം നടത്തി. ഭാര്യ: സൈമ. മകൻ: തേജസ്. മരുമകൾ: ശാരിക.