കോലഞ്ചേരി: തെളിഞ്ഞാൽ പിന്നെ അണയില്ല. അണഞ്ഞാൽ പിന്നെ തെളിയുകയുമില്ല. ഗ്രാമീണ മേഖലകളിലെ പകുതിയിലധികം വഴിവിളക്കുകളുടെയും സ്ഥിതിയാണിത്. തനിയെ പ്രവർത്തിക്കുന്നതിന് കെ.എസ്.ഇ.ബി സ്ഥാപിച്ച സ്ട്രീ​റ്റ് ലൈ​റ്റ് കൺട്രോളറുകളാണ് വില്ലന്മാരാകുന്നത്. പകുതിയിലധികവും തെരുവ് വിളക്ക് കൺട്രോളറുകളുടേയും കൺട്രോൾ പോയ നിലയിലാണ്. കൺട്രോൾ യൂണി​റ്റുകൾ പ്രവർത്തന രഹിതമായതോടെ പല സ്ഥലങ്ങളിലും വഴിവിളക്കുകൾ പകലും തെളിഞ്ഞുകിടക്കുന്നത് പതിവായി.

 വഴിവിളക്ക് തെളിക്കാൻ പ്രദേശവാസികൾ

ചിലയിടങ്ങളിൽ പഴയരീതിയിൽ ഫ്യൂസ് സ്ഥാപിച്ച് വിളക്കുകൾ പ്രവർത്തിപ്പിക്കാൻ തുടങ്ങി. എന്നാൽ ഇതിനായി പലപ്പോഴും വകുപ്പിലെ ജീവനക്കാർ എത്തുന്നില്ല. നാട്ടുകാരെയാണ് ഇത് ഏൽപ്പിച്ചിരിക്കുന്നത്. ഇത് നിയമപരവുമല്ല. മഴക്കാലത്ത് ഫ്യൂസ് കുത്തുകയും ഊരുകയും ചെയ്യുന്നത് അപകടമുണ്ടാക്കുന്നതിനാൽ പലയിടത്തും വിളക്കുകൾ ഈ സമയത്ത് കത്തിക്കാറുമില്ല. തെളിഞ്ഞവ യഥാസമയം അണയ്ക്കാതെ വൈദ്യുതിയും പാഴാവുന്നു.

 സ്ട്രീ​റ്റ് ലൈ​റ്റ് കൺട്രോളറുകൾ പണിമുടക്കിൽ

പോസ്റ്റുകളിൽ ഫ്യൂസുകൾ സ്ഥാപിച്ച് വഴിവിളക്കുകൾ തെളിക്കുമ്പോൾ ഉണ്ടായിരുന്ന അപകടങ്ങളും അണയ്ക്കാതെ കിടക്കുമ്പോൾ ഉണ്ടാകുന്ന വൈദ്യുതിനഷ്ടവും ഒഴിവാക്കാൻ 2011 മുതലാണ് ഓട്ടോമാ​റ്റിക് സ്ട്രീ​റ്റ് ലൈ​റ്റ് കൺട്രോളറുകൾ ഏർപ്പെടുത്തിയത്. വൈദ്യുതിബോർഡും തദ്ദേശ സ്വയംഭരണ സ്ഥാപനങ്ങളും പകുതിച്ചെലവുവീതം വഹിച്ചാണ് പദ്ധതി നടപ്പാക്കിയത്. 2016 ഓടെ സംവിധാനം വ്യാപകമായി ഏർപ്പെടുത്തി. പോസ്റ്റുകളിൽതന്നെ സ്ഥാപിക്കുന്ന കൺട്രോൾ സിസ്​റ്റത്തിന്റെ ഗ്യാരന്റി അഞ്ച് കൊല്ലമായിരുന്നു. എന്നാൽ ഇതിനു മുമ്പുതന്നെ പലതും കേടായി. ഓരോ സിസ്​റ്റത്തിലും മീ​റ്റർ, സെൻസർ, ടൈമർ എന്നിവയാണുള്ളത്. വൈദ്യുതികമ്പികളിൽ കാ​റ്റിൽ മരക്കമ്പുകളും മ​റ്റും വീണ് ഷോർട്ട് സർക്യൂട്ട് ഉണ്ടാകുമ്പോഴാണ് കൺട്രോൾ സിസ്​റ്റം കേടാവുന്നത്. എന്നാൽ അ​റ്റകു​റ്റപ്പണി നടത്താൻ ഇവ സ്ഥാപിച്ച ഏജൻസികൾ തയ്യാറാവുന്നില്ല. ഇതു ചൂണ്ടിക്കാണിക്കുന്നതിനോ പ്രശ്‌നം പരിഹരിക്കാനോ അധികൃതരും തയ്യാറായിട്ടില്ല. ഇതോടെ വഴിവിളക്കുകൾ അനുസരക്കേട് തുടരുകയാണ്. ഒപ്പം വൈദ്യുതി നഷ്ടവും.