കൊച്ചി: ബജാജ് ചേതക് ! പഴയതലമുറ ഇന്ത്യൻ കുടുംബങ്ങൾക്ക്, എന്നും ഗൃഹാതുരത്വം സമ്മാനിക്കുന്ന സ്‌കൂട്ടർ‌. പുത്തൻ ബ്രാൻഡ് മോട്ടോർ സൈക്കിളുകളുടെയും സ്‌കൂട്ടറുകളുടെയും വരവോടെ നിറംമങ്ങിപ്പോയ ചേതക്കിനെ ഇലക്‌ട്രിക് പരിവേഷവുമായി ബജാജ് അടുത്തിടെയാണ് വിപണിയിൽ എത്തിച്ചത്. എന്നാൽ, ബജാജിനെ പോലും ഞെട്ടിച്ചുകൊണ്ട്, പഴയ പ്രതാപത്തെ അനുസ്മരിപ്പിക്കുംവിധം അതിവേഗം വിറ്റുതീർന്ന് വിസ്‌മയം സൃഷ്ടിച്ചിരിക്കുകയാണ് ചേതക്.

ഓൺലൈൻ ബുക്കിംഗ് ആരംഭിച്ച് 48 മണിക്കൂറിനകം അവസാനിപ്പിക്കേണ്ടി വന്നു ബജാജിന്. കമ്പനി ലക്ഷ്യമിട്ട യൂണിറ്റുകളുടെ ബുക്കിംഗ് കവിഞ്ഞതിനെ തുടർന്നാണിത്. എന്നാൽ, എത്ര യൂണിറ്റുകളുടെ ഓർഡർ ലഭിച്ചുവെന്ന് കമ്പനി വ്യക്തമാക്കിയിട്ടില്ല. ബംഗളൂരു, പൂനെ എന്നിവിടങ്ങളിൽ മാത്രമായിരുന്നു ആദ്യം പുത്തൻ ചേതക്കിന്റെ ഷോറൂമുകൾ. പിന്നീട് ചെന്നൈ, ഹൈദരാബാദ് എന്നിവിടങ്ങളിലും സാന്നിദ്ധ്യം അറിയിച്ചു. 2022 ഓടെ കൂടുതൽ നഗരങ്ങളിലേക്ക് എത്തും. വിതരണശൃംഖല പരിശോധിച്ച ശേഷം അടുത്ത ബുക്കിംഗ് തീയതി ഉടൻ പ്രഖ്യാപിക്കുമെന്ന് ബജാജ് വ്യക്തമാക്കിയിട്ടുണ്ട്.

അർബെയ്ൻ, പ്രീമിയം എന്നീ വേരിയന്റുകളാണ് ചേതക്കിനുള്ളത്. അർബെയ്‌ന് 1.42 ലക്ഷം രൂപയും പ്രീമിയത്തിന് 1.44 ലക്ഷം രൂപയുമാണ് വില. ഇൻഡിഗോ മെറ്റാലിക്, ബ്രൂക്ക്‌ലിൻ ബ്ളാക്ക്, വെല്യൂറ്റോ റൂസോ റെഡ്, ഹാസൽനട്ട് നിറഭേദങ്ങളാണ് പ്രീമിയത്തിനുള്ളത്. സിട്രസ് റഷ് ഗ്രീൻ, സൈബർ വൈറ്റ് നിറങ്ങളിൽ അർബെയ്ൻ ലഭിക്കും. പഴയഭംഗി നിലനിറുത്തിക്കൊണ്ടുള്ളതും ആധുനിക ചേരുവകൾ ചേർത്തതുമായ രൂപഭംഗിയാണ് പുത്തൻ ചേതക്കിനുള്ളത്.

ബാറ്ററി 5 മണിക്കൂറിനുള്ളിൽ ഫുൾ ചാർജ് ചെയ്യാം. ക്വിക്ക് ചാർജ് സൗകര്യവുമുണ്ട്. ഇതുവഴി 60 മിനുട്ടിനകം 25 ശതമാനം ചാർജ് ചെയ്യാം. 95 കിലോമീറ്റർ വരെ ഫുൾചാർജിൽ യാത്ര ചെയ്യാം. ടോപ് സ്‌പീഡ് 70 കിലോമീറ്റർ. ഏഥറിന്റെ 450 എക്‌സ്, ടി.വി.എസിന്റെ ഐക്യൂബ് ഇലക്‌ട്രിക് എന്നിവയാണ് വിപണിയിലെ പ്രധാന എതിരാളികൾ.