തിരുവനന്തപുരം: യു.എൻ സാമ്പത്തിക, സാമൂഹിക സമിതിയിൽ പ്രത്യേക ഉപദേശക പദവിയുള്ള ഡബ്ളിയു.എച്ച്.ഐയുടെ പ്രഥമ ഗോൾഡൻ ലാന്റേൺ ദേശീയ പുരസ്‌കാരത്തിന് ഓർത്തഡോക്സ് സഭാ മുംബയ് ഭദ്രാസനാധിപൻ ഗീവർഗീസ് മാർ കൂറിലോസ് മെത്രാപ്പോലീത്ത അർഹനായി. ഔദ്യോഗിക പ്രവർത്തന മേഖലയ്ക്കു പുറത്ത്, സാമൂഹ്യ, വിദ്യാഭ്യാസ, ജീവകാരുണ്യ മേഖലകളിൽ നടത്തുന്ന മാതൃകാപരവും പ്രചോദനാത്മകവുമായ പ്രവർത്തനങ്ങൾക്കാണ് പുരസ്‌കാരം.
മുംബയിലെ ചേരികളിൽ നിന്നുള്ള കുട്ടികൾക്ക് സൗജന്യ വിദ്യാഭ്യാസത്തിന് അവസരമൊരുക്കുന്ന തുടർപദ്ധതിക്കും, ചേരികളിലെ ക്ഷയരോഗികൾക്കായി ആവിഷ്‌കരിച്ച ആരോഗ്യ, ചികിത്സാ പദ്ധിക്കും നൽകിയ വിപ്ലവകരമായ നേതൃത്വത്തിനൊപ്പം വിദ്യാഭ്യാസരംഗത്തു നൽകിയ സമഗ്രസംഭാവനകൾ കൂടി പരിഗണിച്ചാണ് ദേശീയതലത്തിലെ ജൂറി ഗീവർഗീസ് മാർ കൂറിലോസിനെ പുരസ്‌കാരത്തിന് തിരഞ്ഞെടുത്തതെന്ന് ഡബ്ലിയു.എച്ച്.ഐ ചെയർപേഴ്സൺ ഡോ. വിജയലക്ഷ്മി പറഞ്ഞു. പുരസ്‌കാര ലബ്‌ധിയോടെ, യു.എന്നിൽ നടക്കുന്ന ഇന്റർനാഷണൽ വിമൻ കോൺഫറൻസിന്റെ അടുത്ത സമ്മേളനത്തിൽ പ്രബന്ധം അവതരിപ്പിക്കാൻ ഗീവർഗീസ് മാർ കൂറിലോസിന് അവസരം ലഭിക്കും. ജൂലായ് മദ്ധ്യത്തോടെ തിരുവനന്തപുരത്ത് സംഘടിപ്പിക്കുന്ന ചടങ്ങിൽ ഗവർണർ ആരിഫ് മുഹമ്മദ് ഖാൻ പുരസ്‌കാര വിതരണം നടത്തും.