തൊടുപുഴ: പതിനാലുകാരനായ മകന്റെ കണ്ണിന്റെ കാഴ്ച്ച ശക്തി തിരിച്ച്കിട്ടാൻ സഹായിച്ച ഡോക്ടറെയും ആശുപത്രി ജീവനക്കാരെയും വീട്ടുപടിക്കൽ കണ്ടപ്പോൾ കൂലിപ്പണിക്കാരായ മാതാപിതാക്കൾക്ക് അമ്പരപ്പ് . മകൻ ബാലുവിന് വിഷുക്കൈനീട്ടവുമായി എത്തിയതാണെന്ന് കൊച്ചി ആസ്റ്റർ മെഡ്‌സിറ്റിയിലെ ന്യൂറോളജി വിഭാഗത്തിലെ ഡോ. നവീൺ ഹരിദാസ് പറഞ്ഞപ്പോഴാണ് അവർക്ക് കാര്യം പിടികിട്ടിയത്.
കഴിഞ്ഞ വർഷം ആഗസ്റ്റിലാണ് അടിമാലി മാങ്കുളം പഞ്ചായത്തിലെ ആദിവാസി ഊരിലെ കൂലിപ്പണിക്കാരനായ രാജന്റെയും ലക്ഷ്മിയുടെയും നാല് ആൺമക്കളിൽ ഒരാളായ ബാലുവിനെ കണ്ണിനകത്ത് വലിയ ട്യൂമറുമായി ആസ്റ്റർ മെഡ്‌സിറ്റിയിൽ പ്രവേശിപ്പിച്ചത്. ബാലുവിന്റെ കാഴ്ച കുറച്ചെങ്കിലും തിരിച്ച് കിട്ടണമായിരുന്നെങ്കിൽ ഉടനെ ശസ്ത്രക്രിയ ചെയ്യേണ്ടിയിരുന്നു. കുടുംബത്തിന്റെ സാമ്പത്തിക സ്ഥിതി മോശമായിരുന്നതിനാൽ ഡോ. ആസാദ് മൂപ്പന്റെ നേതൃത്വത്തിലുള്ള ഡി.എം ഫൗണ്ടേഷന്റെയും ആസ്റ്റർ സിക്ക് കിഡ്‌സ് ഫൗണ്ടേഷന്റെയും സഹായത്തോടെ തികച്ചും സൗജന്യമായാണ് 5 ലക്ഷം രൂപ വരെ ചെലവ് വരുന്ന ശസ്ത്രക്രിയ ചെയ്തത്. ഡിസ്ചാർജ് ചെയ്ത ശേഷം കൊവിഡ് വ്യാപനത്തെ തുടർന്ന് തുടർ പരിശോധനയ്ക്ക് എത്താൻ ബാലുവിന് കഴിഞ്ഞിരുന്നില്ല. ഈ സാഹചര്യത്തിലാണ് ഡോക്ടർ ബാലുവിനെ വീട്ടിലെത്തി പരിശോധിക്കാൻ ആശുപത്രി മനേജ്‌മെന്റ് തീരുമാനിച്ചത്.
ആശുപത്രി മനേജ്‌മെന്റിന്റെ വിഷുക്കൈനീട്ടം ബാലുവിന് കൈമാറിയതിന് ശേഷം ഡോ. നവീൺ ശസ്ത്രക്രിയാനന്തരമുള്ള പുരോഗതി വിലയിരുത്തി. ബാലുവിന്റെ തുടർ പരിശോധനകളും ചികിത്സയും' ആസ്റ്റർ ഫ്രീ ഇൻ" എന്ന പദ്ധതിയിൽ ഉൾപ്പെടുത്തി ലഭ്യമാക്കും.