തൊടുപുഴ: സപ്ലൈക്കോ സൂപ്പർ മാർക്കറ്റുകളിലും മാവേലി സ്റ്റോറുകളിലും ജോലി ചെയ്തു വരുന്ന ദിവസവേതനക്കാരായ പായ്ക്കിംഗ് തൊഴിലാളികൾക്ക് കൊവിഡ് പരിശോധനയും കൊവിഡ് വാക്‌സിനും നൽകുന്നതിന് അടിയന്തര നടപടി സ്വീകരിക്കണം. ഇതുസംബന്ധിച്ച് സപ്ലൈക്കോ വർക്കേഴ്‌സ് ഫെഡറേഷൻ എഐറ്റിയുസി ജില്ലാ സെക്രട്ടറി കെ സലിംകുമാർ ഭക്ഷ്യസിവിൽ സെൈപ്ലസ് മന്ത്രിക്ക് നിവേദനം നൽകി.

കൊവിഡ് വ്യാപനം രണ്ടാംഘട്ടം രൂക്ഷമാകുന്ന സാഹചര്യത്തിൽ പരിശോധനകളും സൗജന്യ കൊവിഡ് വാക്‌സിൻ കുത്തിവയ്പ്പും എല്ലാ മേഖലകളിലും വ്യാപിപ്പിച്ചിരിക്കുകയാണ്. സർക്കാരിന്റെ പൊതുവിതരണ മേഖലയായ സപ്ലൈക്കോയുടെ സൂപ്പർ മാർക്കറ്റുകളിലും മാവേലി സ്റ്റോറുകളിലും പകൽ അന്തിയോളം പൊതുജനങ്ങളുമായി ബന്ധപ്പെടുന്നവരാണ് പായ്ക്കിംഗ് തൊഴിലാളികൾ. സർക്കാരിന്റെ സൗജന്യ കിറ്റ് പായ്ക്കിംഗിലും വിതരണത്തിലും ഏർപ്പെട്ടിരിക്കുന്ന ദിവസ വേതനക്കാരും പായ്ക്കിംഗ് ജീവനക്കാരുമായ മുഴുവൻ തൊഴിലാളികൾക്കും അടിയന്തിരമായും പരിശോധനയും കൊവിഡ് വാക്‌സിനും നൽകുവാൻ മന്ത്രി ഇടപെടണമെന്ന് അദ്ദേഹം നിവേദനത്തിലൂടെ ആവശ്യപ്പെട്ടു.