പൂമാല: പ്രായം നൂറിനോടടുത്തെങ്കിലും പ്രതിരോധ വാക്‌സിനെടുക്കാൻ അവർ ഒട്ടും മടിച്ചില്ല. പൂമാല ഒരത്തേൽ കണ്ട ഇട്ട്യാതി (99), ഭാര്യ ഓമന ഇട്ട്യാതി (96) എന്നിവരാണ് കഴിഞ്ഞ ദിവസം വെള്ളിയാമറ്റം പഞ്ചായത്തിലെ പന്നിമറ്റത്ത് പ്രവർത്തിക്കുന്ന ശാന്തിനികേതന ഹോസ്പിറ്റലിലെത്തി കൊവിഷീൽഡ് പ്രതിരോധ വാക്‌സിനെടുത്തത്. വാക്‌സിനെടുത്ത ശേഷം സാധാരണ ഗതിയിൽ വരുന്ന ശാരീരിക അസ്വസ്ഥതകളോ ക്ഷീണമോ ഒന്നും തന്നെ ഇരുവരെയും ബാധിച്ചില്ല. ചിട്ടയായ ജീവിത ക്രമമാണ് ഇരുവരും ഇപ്പോഴും പിന്തുടരുന്നത്. പ്രായാധിക്യത്തിന്റെ അവശതയല്ലാതെ മറ്റ് രോഗങ്ങളൊന്നും ഇരുവരെയും ബാധിച്ചിട്ടില്ല. മഹാമാരിയെ തുടർന്നുണ്ടായ ലോക്ക് ഡൗൺ കാലഘട്ടത്തിൽ സർക്കാർ നിർദ്ദേശിച്ച കൊവിഡ് പ്രതിരോധ മാനദണ്ഡങ്ങൾ പൂർണ്ണമായും പാലിച്ച് വീട്ടിൽ തന്നെയാണ് ഇവർ കഴിഞ്ഞത്.
എല്ലാവർക്കും കൊവിഡ് പ്രതിരോധ വാക്‌സിൻ നൽകുന്നതിന്റെ ഭാഗമായാണ് ഇവരെയും വാക്‌സിനെടുപ്പിക്കാൻ തീരുമാനിച്ചത്. ഇരുവരുടെയും വീട്ടുകാരും ബന്ധുക്കളും ചെറിയ ആശങ്ക പങ്കുവച്ചെങ്കിലും ആരോഗ്യ പ്രവർത്തകരുടെ നിർദ്ദേശങ്ങളും കണ്ടയടേയും ഓമനയുടെയും ആത്മവിശ്വാസവും പരിഗണിച്ച് വാക്‌സിനെടുക്കാൻ തീരുമാനിക്കുകയായിരുന്നു.