ഇടുക്കി: നിയമസഭ തിരഞ്ഞെടുപ്പിന്റെ വോട്ടെണ്ണൽ ഒരുക്കങ്ങൾ അവസാനഘട്ടത്തിൽ. പോസ്റ്റൽ ബാലറ്റുകളായിരിക്കും ആദ്യം എണ്ണുക. പോസ്റ്റൽ ബാലറ്റ് എണ്ണിത്തുടങ്ങി അരമണിക്കൂറിന് ശേഷമാണ് ഇലക്ട്രോണിക് വോട്ടിംഗ് മെഷീനുകളുടെ വോട്ടെണ്ണൽ ആരംഭിക്കുക. മണ്ഡലങ്ങളിൽ നിയോഗിച്ചിട്ടുള്ള വരണാധികാരികളുടെ പൂർണ നിയന്ത്രണത്തിലായിരിക്കും വോട്ടെണ്ണൽ. പോസ്റ്റൽ ബാലറ്റുകൾ മുഴുവൻ എണ്ണിത്തീർന്ന ശേഷമേ ഇ.വി.എമ്മുകളുടെ അവസാന റൗണ്ട് വോട്ടെണ്ണൽ നടത്താവൂ എന്ന മുൻ ഉത്തരവ് തിരഞ്ഞെടുപ്പ് കമ്മീഷൻ ഒഴിവാക്കി. ഇ.വി.എം പൂർണമായി എണ്ണി രേഖപ്പെടുത്തിയ ശേഷമായിരിക്കും അതിനോട് പോസ്റ്റൽ വോട്ടുകളുടെ എണ്ണം ചേർക്കുക. ഫലപ്രഖ്യാപനം കഴിവതും നേരത്തെയാക്കാൻ ടേബിളുകളുടെ എണ്ണം വർദ്ധിപ്പിച്ചിട്ടുണ്ട്. കൂടാതെ പോസ്റ്റൽ ബാലറ്റിനുള്ള ടേബിളുകളും കൂട്ടിയിട്ടുണ്ട്.

കൊവിഡ് പ്രോട്ടോകോളിന്റെ ഭാഗമായി എല്ലാ വോട്ടെണ്ണൽ കേന്ദ്രങ്ങളിലും സ്‌പെഷ്യൽ ഒബ്‌സെർവർമാരെ നിയോഗിച്ചിട്ടുണ്ട്. കൂടാതെ ഓരോ ടേബിളിലും ഒരു മൈക്രോ ഒബ്‌സെർവർ വീതവും ഓരോ ഹാളിലും ആറു അസിസ്റ്റന്റ് റിട്ടേണിങ് ആഫീസർമാരും കാണും. ഹാളിന്റെ വലിപ്പം അനുസരിച്ചാണ് ടേബിളുകൾ ക്രമികരിച്ചിരിക്കുന്നത്. കൂടാതെ മാസ്‌ക്, സാനിറ്റൈസർ, ഗ്ലൗസ് തുടങ്ങിയവ ലഭ്യമാക്കും. ആവശ്യമുള്ളവർക്ക് പി.പി.ഇ കിറ്റും നൽകുമെന്ന് ഇലക്ഷൻ ഡെപ്യൂട്ടി കളക്ടർ എൻ. ആർ വൃന്ദദേവി പറഞ്ഞു.

എൻകോർ ആപ്പ്

വോട്ടെണ്ണലിന് തിരഞ്ഞെടുപ്പ് കമ്മിഷൻ തയ്യാറാക്കിയിട്ടുള്ള എൻകോർ എന്ന ആപ്ലിക്കേഷന്റെ പരിശീലന പരിപാടികൾ നടന്നുവരുകയാണ്. കൗണ്ടിങ് മാനേജ്‌മെന്റ് സിസ്റ്റമാണ് എൻകോർ. വോട്ടെണ്ണലിന് നിയോഗിക്കപ്പെട്ട ഉദ്യോഗസ്ഥർക്കുള്ള എൻകോറിന്റെ പരിശീലന പരിപാടിയും ജില്ലയിലെ വിവിധ കേന്ദ്രങ്ങളിലായി നടന്നു.

അഞ്ച് വോട്ടെണ്ണൽ കേന്ദ്രങ്ങൾ

ജില്ലയിൽ അഞ്ചു മണ്ഡലങ്ങളിലായി 5 വോട്ടെണ്ണൽ കേന്ദ്രങ്ങളാണുള്ളത്. ദേവികുളം മണ്ഡലത്തിൽ മൂന്നാർ എൻജിനീയറിംഗ് കോളേജിലാണ് വോട്ടെണ്ണുന്നത്. 15 ടേബിളുകളിലായി 17 റൗണ്ടുകളും പോസ്റ്റൽ ബാലറ്റിന് നാലു റൗണ്ടുകളുമാണുള്ളത്. ഉടുമ്പഞ്ചോല മണ്ഡലത്തിൽ നെടുങ്കണ്ടം സെന്റ് സെബാസ്റ്റ്യൻസ് സ്‌കൂളിലാണ് വോട്ടെണ്ണുന്നത്. 18 ടേബിളുകളിലായി 13 റൗണ്ടുകളും പോസ്റ്റൽ ബാലറ്റിന് ആറു റൗണ്ടുകളുമാണുള്ളത്. തൊടുപുഴ മണ്ഡലത്തിൽ തൊടുപുഴ ന്യൂമാൻ കോളേജിലാണ് വോട്ടെണ്ണുന്നത്. 18 ടേബിളുകളിലായി 16 റൗണ്ടുകളും പോസ്റ്റൽ ബാലറ്റിന് 10 റൗണ്ടുകളുമാണുള്ളത്. ഇടുക്കി മണ്ഡലത്തിൽ പൈനാവ് എം.ആർ.എസ് സ്‌കൂളിലാണ് വോട്ടെണ്ണുന്നത്. 16 ടേബിളുകളിലായി 18 റൗണ്ടുകളും പോസ്റ്റൽ ബാലറ്റിന് ആറു റൗണ്ടുകളുമാണുള്ളത്. പീരുമേട് മണ്ഡലത്തിൽ പീരുമേട് മരിയഗിരി ഇംഗ്ലീഷ് മീഡിയം സ്‌കൂളിലാണ് വോട്ടെണ്ണുന്നത്. 18 ടേബിളുകളിലായി 15 റൗണ്ടുകളും പോസ്റ്റൽ ബാലറ്റിന് നാലു റൗണ്ടുകളുമാണുള്ളത്.