കണ്ണൂർ: പെരിങ്ങളം പുല്ലൂക്കര മുക്കിൽ പീടികയിൽ മുസ്ലിംലീഗ് പ്രവർത്തകൻ മൻസൂർ കൊല്ലപ്പെട്ട സംഭവം ദൗർഭാഗ്യകരമാണെന്ന് സി.പി.എം കണ്ണൂർ ജില്ലാ സെക്രട്ടറി എം.വി.ജയരാജൻ വാർത്താസമ്മേളനത്തിൽ പറഞ്ഞു. ഇതൊരു ആസൂത്രിത കൊലപാതകമല്ല. പുല്ലൂക്കര 150-ാം ബൂത്തിൽ സി.പി.എം പ്രവർത്തകർക്ക് നേരെയുണ്ടായ അക്രമത്തെ തുടർന്നുണ്ടായ സംഘർഷമാണ് ദൗർഭാഗ്യകരമായ സംഭവത്തിനിടയാക്കിയത്.

ലീഗുകാർ തുടങ്ങിയ സംഘർഷമാണ് കൊലപാതകത്തിൽ കലാശിച്ചതെങ്കിലും അത് നടക്കാൻ പാടില്ലായിരുന്നു. കൊലപാതകത്തെ ന്യായീകരിക്കുന്നില്ല. നീതിപൂർവമായ അന്വേഷണത്തിലൂടെ പൊലീസ് കുറ്റവാളികളെ കണ്ടെത്തട്ടെ.

കണ്ണൂരിൽ സംഘർഷം കുറക്കാൻ രാഷ്ട്രീയ നേതൃത്വങ്ങൾ ഫലപ്രദമായി ഇടപെടുന്നുണ്ട്. സമാധാനമുണ്ടാക്കാൻ കൂട്ടായ പരിശ്രമമുണ്ടാകും. ഇതിന് സി.പി.എം മുൻകൈയെടുക്കുമെന്നും ജയരാജൻ വ്യക്തമാക്കി.