കണ്ണൂർ :നിയമസഭാ തിരഞ്ഞെടുപ്പിൽ ജില്ലയിൽ 77.78 ശതമാനം പോളിംഗ് രേഖപ്പെടുത്തിയപ്പോൾ 90 ശതമാനത്തിന് മുകളിൽ പോളിംഗ് രേഖപ്പെടുത്തിയത് 43 ബൂത്തുകളിൽ. പയ്യന്നൂർ മണ്ഡലത്തിൽ 17, തളിപ്പറമ്പ് 11, കല്യാശ്ശേരി 4, ധർമ്മടം 4, തലശ്ശേരി 1, കൂത്തുപറമ്പ് 4, മട്ടന്നൂർ 2 എന്നിങ്ങനെയാണ് 90 ശതമാനത്തിന് മുകളിൽ പോളിംഗ് രേഖപ്പെടുത്തിയ ബൂത്തുകളുടെ കണക്ക്. ഇരിക്കൂർ, അഴീക്കോട്, കണ്ണൂർ, പേരാവൂർ മണ്ഡലങ്ങളിലെ എല്ലാ ബൂത്തുകളിലും പോളിംഗ്‌നില 90 ശതമാനത്തിൽ താഴെയായിരുന്നു.

ജില്ലയിൽ ഏറ്റവും കൂടുതൽ പോളിംഗ് രേഖപ്പെടുത്തിയത് തളിപ്പറമ്പ് മണ്ഡലത്തിലെ തലോറ അങ്കണവാടിയിലെ 9എ ബൂത്തിലാണ്. 95.20 ശതമാനമാണ് ഇവിടുത്തെ പോളിംഗ് നില. ഈ ബൂത്തിലെ 584 പേരിൽ 556 പേരും വോട്ട് രേഖപ്പെടുത്തി. ഏറ്റവും കുറവ് പയ്യന്നൂർ മണ്ഡലത്തിലെ രാമന്തളി ഹയർ സെക്കൻഡറി സ്‌കൂളിലെ 116 എ ബൂത്തിലാണ്. 46.56 ശതമാനമാണ് ഇവിടുത്തെ പോളിംഗ് നില. 625 വോട്ടർമാരിൽ 291 പേർ മാത്രമാണ് ഇവിടെ വോട്ട് രേഖപ്പെടുത്തിയത്.

ഇരിക്കൂർ മണ്ഡലത്തിൽ ഏറ്റവും കൂടുതൽ പോളിംഗ് രേഖപ്പെടുത്തിയത് നടുവിൽ ഗവ. ടെക്‌നിക്കൽ ഹൈസ്‌കൂളിലെ 49എ നമ്പർ ബൂത്തിലാണ്. 88.92 ശതമാനം. കുറവ് പുലിക്കുരുമ്പ സെന്റ് ജോസഫ് യുപി സ്‌കൂൾ 55എ നമ്പർ ബൂത്തിലും 61.75 ശതമാനം. 591 വോട്ടർമാരിൽ 365 പേർ മാത്രമാണിവിടെ വോട്ട് രേഖപ്പെടുത്തിയത്. അഴീക്കോട് മണ്ഡ‌ലത്തിൽ അഴീക്കോട് വെസ്റ്റ് എൽ പി സ്‌കൂളിലെ 31എ ബൂത്തലാണ് കൂടുതൽ വോട്ട് രേഖപ്പെടുത്തിയത് 89.46 ശതമാനം. കുറവ് ശ്രീപുരം ഇംഗ്ലീഷ് മീഡിയം സ്‌കൂൾ 154 ാം നമ്പർ ബൂത്തിലും 67.27 ശതമാനം. കണ്ണൂർ മണ്ഡലത്തിൽ ഏറ്റവും കൂടുതൽ പോളിംഗായ 86.87% രേഖപ്പെടുത്തിയത് മാവിച്ചേരി ന്യൂ യു.പി സ്‌കൂളിലെ 22-ാം നമ്പർ ബൂത്തിലും കുറവ് 59.68 % രേഖപ്പെടുത്തിയത് ദേവത്താർക്കണ്ടി ഗവ. യു.പി സ്‌കൂൾ 117 നമ്പർ ബൂത്തിലുമാണ്. പേരാവൂർ മണ്ഡലത്തിലെ ഉയർന്ന പോളിംഗ് ശതമാനം കുനിത്തല ജി.എൽ.പി സ്‌കൂളിലെ 119-ാം നമ്പർ ബൂത്തിലാണ്, 88.86 ശതമാനം. കുറവ് തുണ്ടിയിൽ സെന്റ് ജോൺസ് യു.പി സ്‌കൂളിലെ 128 ാം നമ്പർ ബൂത്തിലും 61.26 ശതമാനം.