ക​ണ്ണൂ​ർ: ലീ​ഗ് പ്ര​വ​ർ​ത്ത​ക​ൻ പെരിങ്ങത്തൂർ പുല്ലൂക്കരയിലെ മ​ൻ​സൂ​റി​നെ കൊ​ലപ്പെ​ടു​ത്തി​യ കേ​സി​ലെ പ്ര​തി​ക​ൾ കൃ​ത്യം ന​ട​ത്തു​ന്ന​തി​നു മു​ൻ​പ് ഒ​ത്തു ചേ​രു​ന്ന​തി​ന്റെ സി​.സി ടിവി ദൃ​ശ്യ​ങ്ങ​ൾ പു​റ​ത്തായി. കൊ​ല​പാ​ത​കം ന​ട​ക്കുന്നതി​ന് 15 മി​നി​ട്ട് മു​ൻ​പ് സംഭവസ്ഥലത്തിന് നൂ​റ് മീ​റ്റ​ർ അ​ക​ലെ​യാണ് പ്ര​തി​ക​ൾ ഒ​ത്തുചേ​ർ​ന്ന​ത്. സി.പി. എം പ്രദേശിക നേതാവ് സന്ദീപും സംഘത്തിനൊപ്പമുള്ളതായി ദൃശ്യത്തിൽ നിന്നു തെളിഞ്ഞിട്ടുണ്ട്. പ്ര​തി​ക​ൾ ഫോ​ണി​ൽ സം​സാ​രി​ക്കു​ന്ന​തും വീ​ഡി​യോ​യി​ൽ വ്യ​ക്ത​മാ​ണ്. കൊലപാതകത്തിന്റെ ആസൂത്രണം വാട്സ് ആപ് സന്ദേശം വഴിയാണെന്ന് നേരത്തേ അന്വേഷണസംഘം കണ്ടെത്തിയിരുന്നു. പിടിയിലായ ഒന്നാംപ്രതി ഷിനോസിന്റെ ഫോണിൽ നിന്ന്‌ ഇതുസംബന്ധിച്ച എല്ലാ സൂചനകളും പൊലീസിന് ലഭിച്ചിട്ടുണ്ട്. കൂടുതൽ വിവരങ്ങൾ ലഭിക്കാനുള്ള ദൃശ്യങ്ങൾ സമീപത്തെ ഇതര വ്യാപാര സ്ഥാപനങ്ങളിലെ സി.സി ടിവിയിൽ നിന്നു ലഭിച്ചേക്കുമെന്ന നിഗമനത്തിലാണ് അന്വേഷകസംഘം. കേസിൽ നാലുപേരാണ് റിമാൻഡിലുള്ളത്. ഇവരെ സ്ഥലത്തെത്തിച്ച് തെളിവെടുപ്പ് നടത്താമെന്ന് അഭിപ്രായം ഉയർന്നെങ്കിലും എല്ലാ പ്രതികളും പിടിയിലായശേഷം തെളിവെടുപ്പ് നടത്തിയാൽ മതിയെന്നാണ് പൊലീസിന്റെ നിലപാട്. ഇതിനിടെ കേ​സി​ലെ ര​ണ്ടാം പ്ര​തി ര​തീ​ഷി​ന്റെ ദുരൂഹമ​ര​ണ​ത്തി​ലും അ​ന്വേ​ഷ​ണം പു​രോ​ഗ​മി​ക്കു​ക​യാ​ണ്. മ​ക​ന്റെ മ​ര​ണ​ത്തി​ന് കാ​ര​ണ​ക്കാ​രാ​യ​വ​ർ​ക്കെ​തി​രെ ന​ട​പ​ടി സ്വീ​ക​രി​ക്ക​ണ​മെ​ന്ന് ആ​വ​ശ്യ​പ്പെ​ട്ട് ര​തീ​ഷി​ന്റെ അ​മ്മ പ​ത്മി​നി സി​റ്റി പൊ​ലീ​സ് ക​മ്മിഷ​ണ​ർ​ക്ക് പ​രാ​തി ന​ൽ​കി​യി​ട്ടു​ണ്ട്.

ഒരു സി.പി.എം പ്രവർത്തകൻ കൂടി പിടിയിൽ

പാനൂർ: മൻസൂറിനെ കൊലപ്പെടുത്തിയ കേസിൽ സി.പി. എം പ്രവർത്തകനായ പുല്ലൂക്കരയിലെ എലിക്കൊത്തന്റവിട ബിജേഷിനെ (26) പൊലീസ് പിടികൂടി. ഇയാൾ നിലവിൽ പ്രതിപ്പട്ടികയിലുള്ള ആളല്ല. ഇതോടെ ഈ കേസിൽ പിടിയിലായവരുടെ എണ്ണം അഞ്ചായി. പുല്ലൂക്കര സ്വദേശികളായ ഒതയോത്ത് അനീഷ് (35), നിള്ളയിൽ വീട്ടിൽ ശ്രീരാഗ് (25)​,​ നങ്ങാറത്ത് പീടികയിലെ അശ്വന്ത് (29)എന്നിവർ ഇന്നലെ റിമാൻഡിലായി. ഒന്നാം പ്രതി ഷിനോസിനെ നേരത്തെ അറസ്റ്റുചെയ്തിരുന്നു. കഴിഞ്ഞ വെള്ളിയാഴ്ച തൂങ്ങിമരിച്ച നിലയിൽ കണ്ടെത്തിയ രതീഷാണ് രണ്ടാം പ്രതി.