മട്ടന്നൂർ: നിയമസഭാ തിരഞ്ഞെടുപ്പിൽ മട്ടന്നൂർ മണ്ഡലത്തിൽ വിദേശത്തുള്ളവരുടെ വോട്ട് ആൾമാറാട്ടത്തിലൂടെ രേഖപ്പെടുത്തിയെന്ന പരാതിയുമായി യു.ഡി.എഫ്. മട്ടന്നൂർ നിയോജക മണ്ഡലം ചെയർമാൻ ടി.വി.രവീന്ദ്രൻ മുഖ്യതിരഞ്ഞെടുപ്പ് ഓഫീസർ ടീക്കാറാം മീണക്ക് മുന്നിൽ. മാങ്ങാട്ടിടം പഞ്ചായത്തിലുള്ള വട്ടിപ്രം യു.പി. സ്‌കൂളിലെ 122 എ ബൂത്തിൽ അഞ്ചു പേരുടെ വോട്ട് ആൾമാറാട്ടത്തിലൂടെ രേഖപ്പെടുത്തിയെന്നാണ് പരാതിയിൽ പറയുന്നത്.

വിദേശത്തുള്ളവരും സംസ്ഥാനത്തിന് പുറത്തുള്ളവരുമായ നവാസ് കൊയില്യത്ത്, വി.റഫീഖ്, രജിൻ വെള്ളുവക്കണ്ടി, പി.ബി.അഹമ്മദ്, ഒ.ടി.നാസർ, നൗഷീർ കൊയില്യത്ത് എന്നിവരുടെ വോട്ടുകളാണ് ആളുമാറി ചെയ്തതായി പറയുന്നത്. ഇവരുടെ വോട്ട് രേഖപ്പെടുത്തുമ്പോൾ ബൂത്തിലുള്ള യു.ഡി.എഫ്. ഏജന്റ് എതിർത്തിരുന്നെങ്കിലും ഇത് പരിഗണിച്ചില്ലെന്നും പരാതിയിൽ പറയുന്നു.വീഡിയോ പരിശോധിച്ച് കള്ളവോട്ട് ചെയ്തവർക്കെതിരെ നിയമ നടപടി സ്വീകരിക്കണമെന്ന് ആവശ്യപ്പെട്ട് കളക്ടർ, മണ്ഡലം റിട്ടേണിംഗ് ഓഫീസർ എന്നിവർക്കും പരാതി നൽകിയിട്ടുണ്ട്. മണ്ഡലത്തിൽ ഇതുപോലെ നിരവധി പേരുടെ വോട്ടുകൾ ചെയ്തിട്ടുണ്ടെന്നും പരിശോധിച്ച് നിയമനടപടി സ്വീകരിക്കുമെന്നും യു.ഡി.എഫ്. മണ്ഡലം ചെയർമാൻ ടി.വി.രവീന്ദ്രൻ അറിയിച്ചു.