കാസർകോട്: ശ്രവണസഹായി നഷ്ടപ്പെട്ട് ശബ്ദങ്ങളൊന്നും കേൾക്കാൻ കഴിയാതെ സങ്കടത്തിലായ ചെമ്മനാട് കോളിയടുക്കം സ്കൂളിലെ മൂന്നാം ക്‌ളാസുകാരി ആര്യയുടെയും സഹോദരൻ ആദിഷിന്റെയും വീട്ടിലേക്ക് കാരുണ്യ പ്രവാഹം. 90 ശതമാനം കേൾവി കുറവുള്ള മക്കളുടെ ദുരവസ്ഥയിൽ നീറുന്ന കോണത്തുമൂല വയലവുംകുഴിയിലെ എം.സുധാകരനും ഇ.ലതയ്ക്കും പ്രതീക്ഷയേകും വിധമാണ് വിദേശത്ത് നിന്നുൾപ്പടെ സഹായാഭ്യർത്ഥന എത്തുന്നത്.

രണ്ടു കുഞ്ഞുങ്ങളുടേയും സങ്കടകഥ വിവരിക്കുന്ന 'കേരള കൗമുദി' വാർത്ത ശ്രദ്ധയിൽപ്പെട്ട റവന്യു വകുപ്പ് മന്ത്രി ഇ. ചന്ദ്രശേഖരൻ കുട്ടികളുടെയും കുടുംബത്തിന്റെയും ദുരിതങ്ങൾ അകറ്റാൻ ഇടപെടുകയും ആവശ്യമായ സഹായങ്ങൾ എത്തിക്കുന്നതിന് നിർദ്ദേശം നൽകുകയും ചെയ്തു. സാമൂഹ്യ സുരക്ഷാ മിഷൻ എക്സിക്യൂട്ടീവ് ഡയറക്ടർ ഡോ. മുഹമ്മദ് അഷീലിനെ മന്ത്രി ഇതിനായി ചുമതലപ്പെടുത്തി. ഡോ. മുഹമ്മദ് അഷീൽ, കാസർകോട് ജില്ലാ സോഷ്യൽ സെക്യൂരിറ്റി മിഷൻ കോ ഓഡിനേറ്റർ ജിഷോ ജെയിംസിന് ഇത് സംബന്ധിച്ച് അടിയന്തിര നിർദ്ദേശം നൽകി. ജില്ലാ കളക്ടറുടെ വി കെയർ പദ്ധതി പ്രകാരം ആര്യ മോൾക്ക് ശ്രവണ സഹായി എത്തിക്കുന്നതിനും ഒന്നര വയസായ അനുജന് കോഴിക്കോട് മെഡിക്കൽ കോളേജിലെ ഇ .എൻ. ടി വിഭാഗവുമായി ബന്ധപ്പെട്ടു ശ്രുതി തരംഗം പദ്ധതി പ്രകാരം കോക്ലിയാർ ഇമ്പ്ലാൻറ് ചെയ്യാനും നടപടി സ്വീകരിക്കാമെന്ന് ഉറപ്പ് നൽകി. ഐ .സി .ഡി .എസ് മുഖേന ചെമ്മനാട് പഞ്ചായത്തിൽ നിന്നും കേൾവി കുറവുള്ള കുട്ടികൾക്ക് നീക്കിവെച്ച ഫണ്ട് നൽകുന്നതിനും ശ്രമം തുടരുകയാണ്.

വാർത്ത ശ്രദ്ധയിൽപ്പെട്ട ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ ജില്ലാ പഞ്ചായത്ത് പദ്ധതി പ്രകാരം കുട്ടികളെ സഹായിക്കുന്നതിനുള്ള ഏർപ്പാട് ചെയ്യാൻ രാവിലെ തന്നെ ജില്ലാ സാമൂഹ്യനീതി ഓഫീസർ ഷീബ മുംതാസിനെ ബന്ധപ്പെട്ടു നിർദ്ദേശം നൽകി. കോളിയടുക്കം ജി യു പി സ്കൂളിലെ പ്രധാനദ്ധ്യാപികയുടെ നിർദ്ദേശ പ്രകാരം നാലോളം അദ്ധ്യാപകർ ഇന്നലെ രാവിലെ ആര്യയുടെ വീട്ടിലെത്തി വിവരങ്ങൾ ശേഖരിച്ചു. ബേക്കൽ പാലസ് ഉടമ മല്ലിക ഗോപാലനും സഹായ വാഗ്ദാനവുമായി രംഗത്തെത്തിയിട്ടുണ്ട്. കുട്ടികളെ സഹായിക്കുന്നതിന് മറ്റ് നിരവധി പേരും രക്ഷിതാക്കളുമായി ബന്ധപ്പെട്ടിട്ടുണ്ട്. ബാങ്ക് അക്കൗണ്ട് നമ്പർ ചോദിച്ചും ഫോൺ സന്ദേശം പ്രവഹിക്കുന്നുണ്ട്. സോഷ്യൽ മീഡിയയിലും ഇവരെ സഹായിക്കാൻ നിരവധി പേർ മുന്നോട്ടുവന്നിട്ടുണ്ട്. കേരള ഗ്രാമീൺബാങ്കിന്റെ മേൽപറമ്പ ബ്രാഞ്ചിൽ 40454100013839 ആണ് സുധാകരന്റെ അക്കൗണ്ട് നമ്പർ.(.IFSC CODE :KLGB0040454)​.ഫോൺ:9048251541.