കണ്ണൂർ: സംസ്ഥാനത്തെ ജയിലുകളിൽ കൊവിഡ് വ്യാപനം രൂക്ഷമായ സാഹചര്യത്തിൽ ജയിൽപ്പുള്ളികളെ വീഡിയോ കോൺഫ്രൻസ് വഴി ഹാജരാക്കും. തടവുകാരെ​ അവരുടെ സന്ദർശകർകരുമായി ഫോൺ, വീഡിയോ കോൾ, വീഡിയോ കോൺഫറൻസ്​ എന്നിവ വഴി ബന്ധപെടാൻ അനുവദിക്കണം. ജയിലിൽ നേരിട്ടുള്ള സന്ദർശനം നിരുത്സാഹപ്പെടുത്തണം. ജയിലിനുള്ളിൽ വാക്​സിനഷേൻ ക്യാമ്പ് സംഘടിപ്പിക്കണം. തടവുകാർ കൂട്ടം കൂടാനുള്ള അവസരം ഒഴിവാക്കണമെന്നും ജയിൽ ഡി.ജി.പി ഋഷിരാജ് സിംഗിന്റെ ഉത്തരവിൽ പറയുന്നു.

കണ്ണൂർ സെൻട്രൽ ജയിലിൽ 180 പേർക്ക് കൊവിഡ്​ രോഗം സ്​ഥിരീകരിച്ചിരുന്നു​. ജയിലിൽ ചപ്പാത്തി യൂണിറ്റും തടവുകാർ നടത്തുന്ന പെട്രോൾ പമ്പും അടച്ചു. ജയിൽ ജീവനക്കാരും മുൻകരുതലുകൾ സ്വീകരിക്കണം. പോസിറ്റീവാകുന്നവരെയും സമ്പർക്ക പട്ടികയിലുള്ളവരെയും ജയിലിനുള്ളിലെ പ്രത്യേക ബ്ളോക്കിൽ പാർപ്പിക്കണം. പോസിറ്റീവായ രോഗികളിൽ ഗുരുതര ലക്ഷണം കാണുന്നവരെ ഫസ്​റ്റ്​ലൈൻ ട്രീറ്റ്​മെൻറ്​ സെൻററിലേക്ക്​ മാററുന്നതിനുള്ള സജ്ജീകരണങ്ങൾ മുൻകൂറായി നടത്തണം. പുതിയ തടവുകാരെ ആരോഗ്യപരിശോധനയ്ക്ക് വിധേയമാക്കണം .പനി, ശ്വാസകോശ സംബന്ധമായ അസുഖങ്ങൾ, മറ്റു രോഗങ്ങൾ എന്നിവയുള്ളവർക്ക്​ കൃത്യമായ ക്വാറൻറീൻ സൗകര്യം ഏർപ്പെടുത്തി ചികിത്സ ഉറപ്പാക്കണം. 60 വയസ്സിനുമുകളിലുള്ളവരെ പ്രത്യേക ബ്ലോക്കിൽ പാർപ്പിക്കണം. ഇത്തരം തടവുകാരിൽ​ നിശ്​ചിത ഇടവേളകളിൽ ആരോഗ്യ പരിശോധന നടത്തണം. എല്ലാ തടവുകാർക്കിടയിലും കൊവിഡ്​ ടെസ്​റ്റ്​ നടത്തണം. ജയിലിലെ എല്ലാ വാർഡുകളിലും പൊയുവായ ഇടങ്ങളിലും ദിവസവും അണുനശീകരണം, ശുചീകരണം എന്നിവ നടത്തണമെന്നും ഉത്തരവിൽ പറയുന്നു.