കണ്ണൂർ: പ്രഭാത സവാരിക്കിടെ റിട്ട. അദ്ധ്യാപകൻ വാഹനമിടിച്ചു മരിച്ച സംഭവത്തിൽ പൊലീസ്​ പ്രത്യേക അന്വേഷണ സംഘത്തെ രൂപീകരിച്ചു. ഫെബ്രുവരി 23നാണ്​ മയ്യിൽ ടൗണിൽ പ്രഭാത സവാരിക്കിടെ റിട്ട. അദ്ധ്യാപകനും പെൻഷൻ സംഘടനയുടെ ഭാരവാഹിയും ആയ വേളം എ.കെ.ജി. നഗറിലെ ബാലകൃഷ്​ണൻ (72) വാഹനമിടിച്ച്​ മരിച്ചത്​.

ഇടിച്ചിട്ട വാഹനം നിർത്താതെ പോയിരുന്നു. രാവിലെ 5.15നായിരുന്നു അപകടം. അന്വേഷണത്തിൽ തുമ്പില്ലാത്തതിനെ തുടർന്ന്​ പ്രദേശത്തെ സി.സി ടി.വി കാമറകൾ പരിശോധിച്ച്​ പ്രതിയുടെ രേഖചിത്രം അടക്കം തയ്യാറാക്കിയിരുന്നു. എന്നിട്ടും മയ്യിൽ പൊലീസിന്​ പ്രതിയെ പിടികൂടാൻ സാധിച്ചിട്ടില്ല. ഇതേ തുടർന്നാണ്​ കണ്ണൂർ എ.സി.പി ബാലകൃഷ്​ണൻ നായരുടെ നേതൃത്വത്തിൽ പ്രത്യേക അന്വേഷണ സംഘത്തെ നിയോഗിച്ചത്. ജില്ലയുടെ വിവിധ ഭാഗങ്ങളിൽ ഇത്തരത്തിൽ പ്രഭാത സവാരിക്കിടെ വാഹനമിടിച്ച്​ മരിക്കുന്ന അപകടങ്ങൾ വർദ്ധിച്ചിരുന്നു. മിക്ക സംഭവങ്ങളിലും ഇടിച്ചിട്ട വാഹനം നിർത്താതെ പോകുന്നതാണ്​ പതിവ്​.