കോഴിക്കോട്: സംസ്ഥാന സർക്കാരുകൾ കൊവിഡ് പ്രതിരോധ മരുന്ന് വില കൊടുത്ത് വാങ്ങേണ്ട സാഹചര്യം വന്നതിനാലും കോഴിക്കോട് ജില്ലയിലെ ജനങ്ങൾക്ക് വാക്സിനേഷൻ ലഭിക്കുന്നതിനും ജില്ലാ പഞ്ചായത്ത് ഒരു കോടി രൂപ കേരള സർക്കാരിലേക്ക് സംഭാവന നൽകാൻ തീരുമാനിച്ചതായി പ്രസിഡന്റ് കാനത്തിൽ ജമീല അറിയിച്ചു. ജില്ലയിലെ തദ്ദേശ ഭരണ സ്ഥാപനങ്ങൾ വാക്സിൻ ആവശ്യത്തിലേക്ക് സംഭാവന നൽകുന്ന രീതിയിൽ കാര്യങ്ങൾ ഏകോപിപ്പിച്ച് പരമാവധി തുക മുഖ്യമന്ത്രിയുടെ ദുരിതാശ്വാസ നിധിയിൽ എത്തിക്കുമെന്ന് പ്രസിഡന്റ് പറഞ്ഞു. ജില്ലാ പഞ്ചായത്ത് ഭരണസമിതിയിലെ 27 അംഗങ്ങളും വാക്സിൻ വാങ്ങുന്നതിന് സംഭാവന നൽകും. കൊവിഡ് വ്യാപനം തടയുന്നതിന് സർക്കാർ പ്രഖ്യാപിച്ച നിയന്ത്രണങ്ങളോട് എല്ലാവരും സഹകരിക്കണമെന്നും ജില്ലാ പഞ്ചായത്ത് പ്രസിഡന്റ് അഭ്യർത്ഥിച്ചു.