കോഴിക്കോട്: കൊവിഡ് വാക്‌സിൻ ചാലഞ്ചിന്റെ ഭാഗമായി മുഖ്യമന്ത്രിയുടെ ദുരിതാശ്വാസ നിധിയിലേക്ക് കോഴിക്കോട് ജില്ലാ പഞ്ചായത്ത് ഒരു കോടി രൂപ കൈമാറി. ജില്ലാ പഞ്ചായത്തിന്റെ തനത് ഫണ്ടിൽ നിന്നാണ് തുക നൽകിയത്. ജില്ലാ പഞ്ചായത്ത് പ്രസിഡന്റ് കാനത്തിൽ ജമീല കളക്ടർ എസ് സാംബശിവ റാവുവിന് ചെക്ക് കൈമാറി.

ജില്ലാ പഞ്ചായത്ത് വൈസ് പ്രസിഡന്റ് എം .പി ശിവാനന്ദൻ, ജില്ലാ പഞ്ചായത്ത് അംഗങ്ങളായ മുക്കം മുഹമ്മദ്, അഡ്വ .പി ഗവാസ്, നാസർ എസ്റ്റേറ്റ് മുക്ക്, എ .ഡി .എം എൻ പ്രേമചന്ദ്രൻ , ഫിനാൻസ് ഓഫീസർ വി ബാബു എന്നിവർ പങ്കെടുത്തു.

പേരാമ്പ്ര വനിതാ ഹോസ്റ്റൽ കൊവിഡ് ആശുപത്രിയാക്കി മാറ്റുന്നതിന് പേരാമ്പ്ര ഇ. എം.എസ്. സഹകരണ ആശുപത്രിക്ക് മൂന്നു മാസത്തേക്കു വിട്ടുകൊടുക്കാൻ നടപടിയായി.

വില്ല്യാപ്പള്ളി വനിതാ ഹോസ്റ്റൽ കെട്ടിടവും കൂത്താളി ഫാമിലെ പരിശീലന കേന്ദ്രവും ഡൊമിസിലറി കെയർ സെന്ററാക്കി മാറ്റുന്നതിനും ജില്ലാ പഞ്ചായത്ത് തീരുമാനിച്ചു.

കൊളത്തറ വി.കെ.സി. റബർ ഇൻഡസ്ട്രീസ് പ്രൈവറ്റ് ലിമിറ്റഡ് 12 ലക്ഷം രൂപയുടെയും പി.കെ.രഞ്ജിത് കുമാർ (കരുമല, ചാലപ്പുറം)രണ്ടര ലക്ഷം രൂപയുടെയും ചെക്ക് കളക്ടർക്ക് കൈമാറി.