കൊല്ലം: കേരളത്തിൽ തുടർഭരണം വന്നാൽ കോൺഗ്രസ് എന്ന പാർട്ടി ഭൂമുഖത്തുനിന്ന് അപ്രത്യക്ഷമാകുമെന്ന് നടനും മുൻ എംപിയുമായ ഇന്നസെന്റ്. കൊല്ലം മണ്ഡലത്തിലെ എൽ ഡി എഫ് സ്ഥാനാർത്ഥിയായ മുകേഷിന്റെ തിരഞ്ഞെടുപ്പ് പ്രചാരണ പരിപാടിയിൽ സംസാരിക്കുകയായിരുന്നു അദ്ദേഹം.

'തുടർഭരണം വേണമെന്നാണ് എനിക്ക് മുമ്പ് സംസാരിച്ചവരൊക്കെ പറഞ്ഞത്. പക്ഷേ എനിക്ക് അത്ര താൽപര്യമില്ല. കാരണം, ഇനി തുടർഭരണം ഉണ്ടായാൽ കോൺഗ്രസ് എന്നു പറയുന്ന സാധനം ഈ പൂമുഖത്തുണ്ടാകില്ല. ഒറ്റ സ്ഥലത്തില്ല. എന്തുകൊണ്ട് കേന്ദ്രത്തിൽ നിന്ന് ഓരോരുത്തരും വരുന്നെന്നറിയോ? അവിടെയൊന്നും ഇല്ല ഈ സാധനം. ഇത്രയധികം വർഷങ്ങൾ കോൺഗ്രസ് ഭരിച്ചിട്ടും എന്താണ് അവർക്ക് ചെയ്യാൻ സാധിച്ചത്. മുഖ്യമന്ത്രി രാജിവയ്ക്കണം, മുഖ്യമന്ത്രി രാജിവയ്ക്കണം, ഇതുമാത്രമാണ് അവർക്ക് പറയുവാനുള്ളത്.

എനിക്ക് പപ്പടം വേണം, പപ്പടം വേണം എന്നു പറഞ്ഞ് കുട്ടി കരഞ്ഞാൽ അത് കൊടുക്കുകയല്ലേ മര്യാദ. ഈ പിണറായി അത് ചെയ്തില്ല. അപ്പോൾ മുഖ്യമന്ത്രി മാറി പിണറായി വിജയൻ രാജിവയ്ക്കണമെന്നായി, അതും മാറി വിജയൻ എന്നാക്കി. ഒരിക്കൽ മുഖ്യമന്ത്രിയെ കണ്ടപ്പോൾ ഞാൻ വെറുതെ ഒരു നേരം പോക്കിന് ചോദിച്ചു, 'എത്രയോ നാളുകളായി അവർ ഇങ്ങനെ രാജിവയ്ക്കൂ, രാജിവയ്ക്കൂ എന്നു പറയുന്നു എന്നാൽ ഒന്ന് സമ്മതിച്ചുകൊടുത്തൂടെ.' അപ്പോൾ അദ്ദേഹം പറഞ്ഞു, ' ഇന്നസെന്റേ, ഞാൻ രാജിവച്ചിട്ട് ഈ സ്ഥാനം അവരുടെ കയ്യിൽ ഏൽപിച്ചാലുളള സ്ഥിതി ഒന്ന് ആലോചിച്ചു നോക്കിക്കേ.'- ഇന്നസെന്റ്‌ പറഞ്ഞു.