ഹോങ്കോംഗ്​: 2019 ആഗസ്റ്റ്​ 18ന് ഹോങ്കോംഗിലെ വിക്​ടോറിയ പാർക്കിൽ നടന്ന പ്രതിഷേധത്തിന്​ നേതൃത്വം നൽകിയ ഹോങ്കോംഗിലെ പ്രതിപക്ഷ നേതാക്കളിലേറെയും കുറ്റക്കാരെന്ന്​ ചൈനീസ് കോടതി.

മുതിർന്ന ജനാധിപത്യ നേതാവും സാമാജികനുമായ മാർട്ടിൻ ലീ, മാദ്ധ്യമ രംഗത്തെ പ്രധാനി ജിമ്മി ലായ്​ തുടങ്ങി ഏഴുപേരെയാണ്​ കോടതി കുറ്റക്കാരായി കണ്ടത്​.

പൊലീസ്​ ഇവർക്കെതിരെ ചുമത്തിയിരിക്കുന്നത് 10 വർഷം വരെ തടവു ലഭിക്കാവുന്ന കുറ്റങ്ങളാണ്​​.

ദേശീയ സുരക്ഷ നിയമം ചുമത്തി വേറെയും കേസുകളിൽ വിചാരണ നേരിടുന്ന ലീ, ഹോങ്കോംഗിൽ ജനാധിപത്യത്തിന്റെ പിതാവായി വാഴ്​ത്തപ്പെടുന്ന നേതാവാണ്​. മറ്റു നേതാക്കളായ മാർഗരറ്റ്​ എൻജി, സിഡ്​ ഹോ സോ ലാൻ, ആൽബർട്ട ഹോ ചുൻയാൻ, ലീ ച്യൂക്​ യാൻ, ല്യൂങ്​ കോക്​ ഹുങ്​ തുടങ്ങിയവരെയും കുറ്റക്കാരായി വിധിച്ചിട്ടുണ്ട്​.

2019ൽ നടന്ന, 17 ലക്ഷത്തോളം പേർ പങ്കെടുത്ത പ്രതിഷേധ സമരം സമാധാനപരമായിരുന്നു. പൊലീസ്​ അനുമതി നിഷേധിച്ചിരുന്നു എന്നു ചൂണ്ടിക്കാട്ടിയാണ്​ നേതാക്കൾക്കെതിരെ കേസെടുത്തത്.