ന്യൂയോർക്ക്: ലോകത്ത് കൊവിഡ് വ്യാപനം രൂക്ഷമായി തുടരുന്നു.വേൾഡോമീറ്ററിന്റെ കണക്കുപ്രകാരം അഞ്ച് ലക്ഷത്തിലധികം കേസുകളാണ് കഴിഞ്ഞ ദിവസം റിപ്പോർട്ട് ചെയ്തത്. ഇതോടെ ആകെ രോഗബാധിതരുടെ എണ്ണം പതിമൂന്ന് കോടി പതിമൂന്ന് ലക്ഷം പിന്നിട്ടു. 28.58 ലക്ഷം പേർ മരിച്ചു.

ഏറ്റവും കൂടുതൽ രോഗികളും മരണങ്ങളും റിപ്പോർട്ട് ചെയ്തത് അമേരിക്കയിലാണ്. യുഎസിൽ മൂന്ന് കോടി പതിമൂന്ന് ലക്ഷം രോഗബാധിതരുണ്ട്. അരലക്ഷത്തിലധികം പുതിയ കേസുകൾ റിപ്പോർട്ട് ചെയ്തു.മരണസംഖ്യ 5.68 ലക്ഷമായി ഉയർന്നു.

വൈറസ് ബാധിതരുടെ എണ്ണത്തിൽ അമേരിക്കയ്ക്ക് തൊട്ടുപിന്നിൽ ബ്രസീലാണ്. രാജ്യത്ത് ഒരു കോടി ഇരുപത്തിയൊൻപത് ലക്ഷം രോഗബാധിതരാണ് ഉള്ളത്. 40,000ത്തിലധികം പേർക്കാണ് ഇന്നലെ രോഗം സ്ഥിരീകരിച്ചത്. 3.30 ലക്ഷം പേർ മരിച്ചു.

രോഗബാധിതരുടെ എണ്ണത്തിൽ മൂന്നാം സ്ഥാനത്ത് ഇന്ത്യയാണ്. 89,000ത്തിലധികം പേർക്കാണ് രാജ്യത്ത് കഴിഞ്ഞ ദിവസം രോഗം സ്ഥിരീകരിച്ചത്. പ്രതിദിന രോഗികളുടെ എണ്ണത്തിൽ ഇന്ത്യയാണ് ഇപ്പോൾ ലോകത്ത് ഒന്നാം സ്ഥാനത്ത്. നിലവിൽ 6.58 ലക്ഷം പേരാണ് ചികിത്സയിലുള്ളത്. ആകെ രോഗബാധിതരുടെ 5.32 ശതമാനമാണിത്. ഫ്രാൻസ്(47ലക്ഷം രോഗബാധിതർ),റഷ്യ(45 ലക്ഷം രോഗബാധിതർ)എന്നീ രാജ്യങ്ങളിലും രോഗവ്യാപനം രൂക്ഷമായി തുടരുകയാണ്.