കയ്​റോ: എവർഗിവൺ കപ്പൽ മൂലം സൂയസിൽ കുടുങ്ങിക്കിടന്ന മുഴുവൻ കപ്പലുകളും കനാൽ കടന്നു. സൂയസിലും മെഡിറ്ററേനിയനിലും ചെങ്കടലിലുമായി കുടുങ്ങിയ 422 കപ്പലുകളാണ്​ നീങ്ങിത്തുടങ്ങിയത്.

മാർച്ച്​ 23ന്​ കാറ്റിലുലഞ്ഞ്​ കനാലിൽ കുടുങ്ങിയ ഭീമൻ ചരക്കു കപ്പലായ എവർഗിവണിനെ ഒരാഴ്ച നീണ്ട രക്ഷാദൗത്യ​ത്തിനൊടുവിൽ കഴിഞ്ഞ തിങ്കളാഴ്ചയാണ്​ രക്ഷപ്പെടുത്തിയത്​. തൊട്ടുപിറകെ കുടുങ്ങിക്കിടന്ന കപ്പലുകൾ ​യാത്ര തുടങ്ങിയെങ്കിലും കുരുക്ക്​ പൂർണമായി അവസാനിക്കാൻ ഒരാ​ഴ്ചയെങ്കിലും എടുക്കുമെന്ന്​ അധികൃതർ വ്യക്​തമാക്കിയിരുന്നു. ശനിയാഴ്ച മാത്രം 85 കപ്പലുകൾ കനാൽ കടന്നപ്പോൾ ഇതിൽ 61 എണ്ണം കുടുങ്ങിക്കിടന്നവയായിരുന്നു. 400 മീറ്റർ നീളമുള്ള കപ്പൽ 200 മീറ്ററിലേറെ വീതിയുള്ള കനാലിനു കുറുകെ കുടുങ്ങിയത്​ ആഗോള ചരക്കുകടത്തിനെ പ്രതികൂലമായി ബാധിച്ചിരുന്നു. ടൺ കണക്കിന് അവശ്യവസ്തുക്കളാണ് കപ്പലുകളിൽ കെട്ടികിടന്നത്. പ്രതിദിനം 900 കോടി ഡോളർ വരുന്ന ചരക്കു കടത്ത്​ സമ്പൂർണമായി മുടങ്ങി. കാറ്റ് മൂലം കപ്പൽ കുടുങ്ങുകയായിരുന്നുവെന്നാണ് ജീവനക്കാരുടെ ഭാഷ്യം. സംഭവത്തിൽ അന്വേഷണം പുരോഗമിക്കുകയാണ്​. രണ്ട് ദിവസത്തിനുള്ളിൽ അന്വേഷണ റിപ്പോർട്ട് പുറത്തുവരുമെന്നാണ് വിവരം.

 എവർഗിവൺ കുരുക്കിലാകുമോ?

422 കപ്പലുകളിലായി 2.6 കോടി ടൺ ചരക്കാണ്​ കെട്ടിക്കിടന്നിരുന്നത്. യാത്രയ്ക്ക് തടസ്സം നേരിട്ടതിനാൽ ചില ചരക്കുകൾക്ക് കേടുവരാൻ സാദ്ധ്യതയുണ്ട്. എവർഗിവണിന്റെ പിഴവ് മൂലമാണ് ഗതാഗത തടസ്സമുണ്ടായതെങ്കിൽ മറ്റു കപ്പലുകൾക്ക് ശതകോടികൾ നഷ്ടപരിഹാരമായി ആവശ്യപ്പെടാം.

അതേസമയം, നഷ്​ടപരിഹാരം നൽകാതെ എവർഗിവണിനെ കനാൽ വിട്ടുപോകാൻ അനുവദിക്കില്ലെന്ന്​ ഈജിപ്ഷ്യൻ സർക്കാർ വ്യക്​തമാക്കിയിട്ടുണ്ട്​. എവർഗിവൺ കുടുങ്ങിയ സമയത്ത്​ കനാലിലുണ്ടായിരുന്ന മറ്റു കപ്പലുകളൊന്നും കാറ്റ്​ പ്രശ്​നമായി പറഞ്ഞിരുന്നില്ല. കാറ്റ്​ പ്രതിരോധിക്കാൻ ചരക്കു കപ്പലുകളിൽ സംവിധാനവുമുണ്ട്​.

 മെഡിറ്ററേനിയൻ കടലിനെ ചെങ്കടലുമായി ബന്ധിപ്പിക്കുന്ന സൂയസ്​ കനാൽ യൂറോപ്പിനും ഏഷ്യക്കുമിടയിലെ പ്രധാന നാവിക വ്യാപാര പാതയാണ്​. ആഫ്രിക്ക ചുറ്റിയുളള പാത 7,000 കിലോമീറ്റർ അധികം വരുമെന്നതിനാൽ പകരം സൂയസ്​ കനാലിനെയാണ്​ കപ്പലുകൾ പ്രധാനമായും ആശ്രയിക്കുന്നത്​.